Türkiyənin İzmir şəhərində Avropa Uşaq Cərrahları Assosiasiyasının (EUPSA) 24-cü konqresi keçirilib.

“Uşaq cərrahiyyəsinin müxtəlif aspektləri”nə həsr olunmuş konqresdə ölkəmizi Azərbaycan Uşaq Cərrahları Assosiasiyasının sədri, ATU-nun Uşaq cərrahlığı kafedrasının müdiri, professor Ramiz Poluxov və K.Fərəcova adına Elmi-Tədqiqat Pediatriya İnstitutunun direktoru, tibb üzrə fəlsəfə doktoru Lətif Zeyniyev təmsil ediblər.

Bu barədə Aztibb.az-a ATU-dan xəbər verilib.

Konqresin keçirildiyi 4 gün ərzində 300-dən çox məruzə müzakirə olub.

Tədbirdə azərbaycanlı həkimlər tərəfindən Azərbaycan Tibb Universitetinin Stavropol Dövlət Tibb Universiteti, Rusiya Tibb Elmləri Akademiyası, Xabarovskda fəaliyyət göstərən Uzaq Şərq Dövlət Tibb Universitetinin uşaq cərrahlığı kafedralarının “Uşaq cərrahiyyəsi sosial mediada” mövzusunda apardığı birgə araşdırma təqdim olunub.

Azərbaycanlı həkimlər fasilələr zamanı EUPSA prezidenti Amulya Saxena, 24-cü konqresin sədri, Egey Universitetinin professoru Orkan Ergün, Türkiyə Uşaq Cərrahlığı Dərnəyinin katibi, professor Tutku Soyer, Ankara Şəhər Xəstəxanasının baş həkimi, professor Emrah Şenel, həmin xəstəxananın Uşaq yanıq və yara bölümünün rəhbəri, dosent Sabri Demirlə aktual məsələləri müzakirə ediblər.