"Yeni Klinika"da 17 İyun – Tibb İşçilərinin Peşə Bayramı Günü münasibətilə tədbir keçirilib.

Müəssisədən Aztibb.az-a verilən xəbərə görə, tədbirdə “Yeni klinika” tibb müəssisəsinin direktor vəzifəsini icra edən, baş həkim Cavid Paşayev bu günün təsis edilməsinin Ümummilli Liderin tibb işçilərinin zəhmətinə yüksək dəyər verməsinin əsas göstəricisi olduğunu bildirib.

Pandemiya və 44 günlük müharibə dövründə həkimlərin göstərdiyi fədəkarlığın danılmaz bir fakt olduğunu ifadə edən baş həkim həmin dövrdə şəhid olan həkimlərə rəhmət diləyib.

Daha sonra direktorun müalicə işləri üzrə müavini vəzifəsini icra edən, Terapiya şöbəsinin müdiri Dilman Əhmədov, Həmkarlar İttifaqının sədri, endokrinoloq Səbinə Paşayeva, Urologiya şöbəsinin müdiri Emil Muxtarov, Kardiologiya şöbəsinin müdiri Şahanə Ələsgərli, Təcili və Təxirəsalınmaz Tibbi Yardım şöbəsinin müdiri Nicat Nəcəfov çıxış edərək çətin, eyni zamanda şərəfli peşənin sahiblərini təbrik ediblər.

Sonda direktorun müalicə işləri üzrə müavini vəzifəsini icra edən Dilman Əhmədov və tibbi şöbələr Tibb İşçilərinin Peşə Bayramı Günü münasibətilə təltif ediliblər.

Tədbirin bədii hissəsində pandemiya və 44 günlük müharibə dövrünün görünməz qəhrəmanlarını əks etdirən videoçarx nümayiş etdirilib.