Əməkdar artist Bəhram Bağırzadə Mərkəzi Gömrük Hospitalında 17 iyun - Tibb İşçilərinin Peşə Bayramı Günü ərəfəsində səhiyyə işçilərinin uşaqlarına imza tədbiri keçirib.

 

Aztibb.az-a bu barədə Mərkəzi Gömrük Hospitalından məlumat verilib.

 

İmza tədbirindən öncə Əməkdar artist Bəhram Bağırzadə Dövlət Gömrük Komitəsi Tibbi Xidmət İdarəsinin rəisi Ceyhun Məmmədov, rəis müavini İsmayıl Əfəndiyev, Gömrük Hospitalının baş həkimi Bəxtiyar Musayev, Reanimasiya və anesteziologiya şöbəsinin rəisi Tural Sadıqov, anestezioloq-reanimatoloq Xəyal Məmmədov və tibb bacıları ilə görüşüb.

 

Görüşdə DGK Tibbi Xidmət İdarəsinin rəisi Ceyhun Məmmədov hər il 17 iyun - Tibb İşçilərinin Peşə Bayramı Günü ərəfəsində yeni kitablarının İmza gününü məhz Mərkəzi Gömrük Hospitalında keçirdiyi üçün Bəhram Bağırzadəyə təşəkkürünü bildirib. İdarə rəisi sənətkara özünün, rəis müavini İsmayıl Əfəndiyevin, Mərkəzi Gömrük Hospitalının Baş həkimi Bəxtiyar Musayevin, Reanimasiya və anesteziologiya şöbəsinin rəisi Tural Sadıqovun, anestezioloq-reanimatoloq Xəyal Məmmədovun və həkim-infeksionist Mədinə Abdullayevanın imzaladıqları “COVID-19-un diaqnostika və müalicəsi” üzrə metodik vəsaiti və xatirə hədiyyəsi təqdim edib.

 

Əməkdar artist Bəhram Bağırzadə Ceyhun Məmmədov başda olmaqla bütün kollektivi Tibb İşçilərinin Peşə Bayramı Günü münasibətilə təbrik edib, onlara şərəfli və fədakar fəaliyyətlərində uğurlar arzulayıb.

 

Mərkəzi Gömrük Hospitalının foyesində davam edən görüşdə Bəhram Bağırzadə uşaqlar üçün yazdığı kitablarını imzalayaraq, onlara hədiyyə edib.

 

Tədbir uşaqların böyük sevincinə səbəb olub. Onun təqdim etdiyi kitablar arasında uşaqlar üçün nəzərdə tutulmuş “Qarabağ Azərbaycandır”, “Bakı”, “Avtomobilin hekayəsi”, “Şuşa”, “Quranda adı çəkilən bitkilər” “Su haqqında”, “Hacı Zeynalabdin Tağıyev”, “Azərbaycan silahlı qüvvələri”, “Nizami Gəncəvi” və digər kitablar yer alıb.

 

Sonda Əməkdar artist uşaqların suallarını cavablandırıb.