Pirallahı Rayon İcra Hakimiyyətinin təşkilatçılığı ilə Pirallahı Tibb Mərkəzində “İnsan hüquqları aylığı” çərçivəsində “Məişət və gender əsaslı zorakılıqla mübarizə” mövzusunda maarifləndirici tədbir keçirilib.

 

Aztibb.az-a Pirallahı Tibb Mərkəzindən verilən məlumatda bildirilir ki, tədbirdə Rayon İcra Hakimiyyəti başçısı aparatının məsul əməkdaşları və Mərkəzin kollektivi iştirak ediblər.

 

Tədbirdə Rayon İcra Hakimiyyəti başçısı Aparatının İctimai-siyasi və humanitar məsələlər şöbəsinin müdiri Arzu Abdullayev, Pirallahı Tibb Mərkəzinin məsul nümayəndələri çıxışlar edərək bildiriblər ki, Ümummilli Lider Heydər Əliyevin 1998-ci il 18 iyun tarixli sərəncamı ilə “İnsan hüquqlarının müdafiəsinə dair Dövlət Proqramı”nın təsdiq olunduğunu nəzərə alan ölkə Prezidenti İlham Əliyevin 2007-ci il il 18 iyun tarixli Sərəncamına əsasən, hər il 18 iyun tarixi Milli İnsan Hüquqları Günü kimi qeyd olunur.

 

Bildirilib ki, bu gün hüquqi dövlət quruculuğu yolunu seçmiş ölkəmizdə həyata keçirilən tədbirlər və islahatlar insanlarda şüurlu surətdə hüquqi inamın formalaşmasına, əhali arasında hüquq mədəniyyətinin yayılmasına və bu istiqamətdə uğurlu nəticələrin əldə olunmasına öz töhfəsini verməkdədir.