Bakıda Ümumdünya Səhiyyə Təşkilatının (ÜST) Avropa üzrə Regional Ofisi, Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB-in birgə təşkilatçılığı ilə “Məqsədə uyğun xəstəxanalar: müasir səhiyyənin tələblərinə cavab vermək üçün keyfiyyət və davamlılığın prioritetləşdirilməsi” mövzusuna həsr olunan beynəlxalq görüş davam edir.

 

Səhiyyə Nazirliyindən Aztibb.az-a verilən xəbərə görə, tədbir çərçivəsində Azərbaycanın səhiyyə sistemində aparılan dinamik islahatlar və innovativ yanaşmalar mövzusunda sessiya keçirilib. Sessiyada Səhiyyə Nazirliyinin Tibb xidmətləri şöbəsinin müdiri Fazil Hüseynbəyov təqdimatla çıxış edib.

 

Təqdimatda qeyd edilib ki, xəstəxanalarda effektiv strateji planlaşdırma və monitorinq, perspektiv hədəflər və onlara nail olunması üzrə addımların sistemliyini özündə cəmləşdirir: “Xəstəxanalar keyfiyyətli tibbi xidmətlərin göstərilməsinin təmin edilməsi üçün hərtərəfli və müntəzəm monitorinq tələb edən çoxfunksiyalı müəssisələrdir. Rəqəmsal transformasiya dövründə xəstəxanaların monitorinqi yeni texnologiyaların və məlumatların analizi metodlarının tətbiqi sayəsində çoxsaylı dəyişikliklərə məruz qaldı. Bu da daha əhatəli və effektiv yanaşmanın tətbiq edilməsinə imkan verir”, - deyə Fazil Hüseynbəyov fikrini tamamlayıb.

 

Yerli və beynəlxalq iştirakçıların, həmçinin ÜST ekspertlərinin fəal iştirakı ilə baş tutan sessiyada xəstəxanalarda potensial risklərin müəyyənləşdirməsi, onların azaldılması üzrə planların işləyib hazırlanması və digər aktual məsələlər müzakirə olunub.