ÜST-nin Avropa üzrə Regional Ofisinin Azərbaycan Respublikası Səhiyyə Nazirliyi, İcbari Tibbi Sığorta üzrə Dövlət Agentliyi və TƏBİB ilə birgə təşkil etdiyi yüksək səviyyəli regional görüşün ilk günü çərçivəsində Azərbaycan Dövlət Akademik Filarmoniyasında tədbir iştirakçıları və qonaqlar üçün konsert proqramı təşkil olunub.

 

Aztibb.az ÜST-nin Azərbaycan nümayəndəliyinə istinadla xəbər verir ki, “Məqsədə uyğun xəstəxanalar: müasir səhiyyənin tələblərinə cavab vermək üçün keyfiyyət və davamlılığın prioritetləşdirilməsi” mövzusuna həsr olunan tədbir Avropa regionundan 200-dən çox hökumət nümayəndəsini, xəstəxanaların tibb işçilərini və tərəfdaşları bir araya gətirməklə yanaşı, qonaqlara Azərbaycan mədəniyyətini və qonaqpərvərliyini tanıtmağı, həmçinin ünsiyyət və fikir mübadiləsi üçün əlverişli şərait yaratmağı nəzərdə tutur.

 

Bu məqsədlə təşkil olunan konsert proqramı və ziyafət 500-ə qədər qonağı əhatə edib. Azərbaycan Dövlət Xalq Çalğı Alətləri Orkestrinin Azərbaycan və dünya musiqisinin ən çox sevilən əsərlərini təqdim etdiyi axşamda tədbir iştirakçıları ləzzətli təamlardan zövq alaraq şəhərin ən gözəl və əzəmətli tikililərindən biri olan filarmoniyada gözəl dostluq və həmrəylik ab-havasından zövq alıblar.

 

Qeyd edək ki, tədbirin bədii və sosial hissəsi 6-7 iyun tarixlərində də davam edəcək.