TƏBİB əməkdaşları İsveçin paytaxtı Stokholm şəhərində keçirilən “Fövqəladə hallara hazırlıq və cavab planlarını təkmilləşdirmək üçün simulyasiya təlimi”ndə (SimEx) iştirak ediblər.

 

Aztibb.az-a TƏBİB-dən bildirilib ki, təlim Avropa Xəstəliklərin Profilaktikası və Nəzarəti Mərkəzi tərəfindən təşkil olunub.

 

TƏBİB-in əməkdaşları Emil İskəndərov, Vəfa Qocayeva və Atilla Turan Bayramov fövqəladə hallara hazırlıqla bağlı aktiv müzakirələrə qatılıblar.

 

Qeyd edək ki, təlimin məqsədi ictimai sağlamlıq şəraitində simulyasiya məşqlərinin hazırlanması istiqamətində ümumi təlimat verməkdir.

 

Simulyasiya təlimləri hazırlıq planının və strategiyasının bir hissəsi olaraq, infeksion xəstəliklərlə bağlı hadisələrə adekvat cavab vermək üçün səlahiyyətli orqanlara və qurumlara kömək məqsədini daşıyır.

İxtisaslaşmış ictimai səhiyyə ekspertləri, xüsusən də cavab tədbirlərinin hazırlanmasına və ya simulyasiya təlimlərinin təşkilinə cavabdeh səlahiyyətli qurumlar üçün faydalı hesab edilir.