Aztibb.az-a Mərkəzdən verilən məlumata görə, 1985-ci il təvəllüdlü şəxs 13 may tarixində kəskin sirkə turşusu, fəsadlaşmış qanaxma, mədə bağırsaq qanaxması, hemoliz, kəskin böyrək çatışmazlığı diaqnozu ilə TƏBİB-in tabeliyindəki Kliniki Tibbi Mərkəzin Toksikologiya şöbəsinə yerləşdirilib.

 

Həyat əlamətləri kifayət qədər aşağı olan xəstədə aparılan müayinələr zamanı diaqnozlar öz təsdiqini tapıb. Kəskin böyrək çatışmazlığı olan xəstəyə müalicə müddəti ərzində dializ müayinəsi də aparılıb. Ümumilikdə bir neçə ixtisas həkiminin nəzarətində olan xəstəni həyata qaytarmaq mümkün olub.

 

Hazırda xəstənin vəziyyəti stabil olduğu üçün sahə həkiminin nəzarətində evə buraxılıb.

 

Məlumat üçün bildirək ki, sirkə turşusu qəbul edən şəxsdə kimyəvi reaksiya yarandığı üçün bütün selikli qişalar və orqanlara ciddi ziyan dəyir. Həmçinin böyük bir maye və qan itkisinə səbəb olur. Buna görə güclü bir ağrı sindromu baş qaldırır.

 

Sirkə və ya digər maddələrdən zəhərlənmə baş verdiyi halda təcili yardım çağırmaq və ya tibb müəssisəsinə müraciət etmək vacibdir.