Xətai Tibb Mərkəzinin Doğum şöbəsində ilk körpə dünyaya gəlib. Həm də ailənin ilk övladı olan qız uşağı tam sağlamdır.

Doğuşu həyata keçirən həkim, Doğum şöbəsinin müdiri, tibb üzrə fəlsəfə doktoru Mehriban Hacəzadə Aztibb.az-a bildirib ki, uşağın çəkisi tam normal 3 kilo 800 qram, boyu isə 51 sm-dir.

Xatırladaq ki, TƏBİB-in Xətai Tibb Mərkəzinin Ginekologiya və doğum şöbəsi əsaslı təmirdən sonra fəaliyyətə başlayıb. Şöbə 10 ildən artıq fəaliyyət göstərib. 2013-cü ildə Doğum şöbəsi müvəqqəti fəaliyyətini dayandırsa da, Ginekologiya şöbəsi əhaliyə xidmət göstərməyə davam edib.

Şöbə ən yeni tibbi avadanlıqlarla, anesteziya aparatı, neonatal süni tənəffüs aparatı, isidicili uşaq bələmə masası, perfusomat, infusomat, xəstəbaşı monitor, EKG aparatı, portativ rentgen aparatı, əməliyyat masası, vakuum aspirasiya cihazı, süni tənəffüs aparatı, küveyz, avtoklav, sterilizator və s. təchiz edilib. Hazırda şöbədə 10 mama-ginekoloq, 3 həkim-neonatoloq, 5 mama, 10 tibb bacısı fəaliyyət göstərir.
Xətai Tibb Mərkəzi 2 korpusdan, 152 çarpayıdan ibarətdir. Tibb mərkəzində Terapiya, Nevrologiya, Reanimasiya və intensiv terapiya, Ümumi cərrahiyyə və uşaq cərrahiyyəsi şöbələri, Bakı şəhəri üzrə yeganə 24 saat təcili və təxirəsalınmaz xidmət göstərən Otorinolarinqologiya şöbəsi var.