Avropa İttifaqının maliyyələşdirdiyi, ÜST-nin Azərbaycan nümayəndəliyinin həyata keçirdiyi “Vaksinasiyaya dəstək” layihəsi çərçivəsində Rutin İmmunlaşdırma üzrə Keyfiyyət Tədqiqatının nəticələri milli səhiyyə tərəfdaşları, beynəlxalq inkişaf agentlikləri, QHT-lər, səhiyyə sahəsində fəaliyyət göstərən media nümayəndələri və pasiyent assosiasiyalarına təqdim olunub.

 

Aztibb.az ÜST-nin Azərbaycan nümayəndəliyinə istinadla xəbər verir ki, fevral-mart aylarında Səhiyyə Nazirliyi və TƏBİB ilə əməkdaşlıq çərçivəsində ÜST ekspertlərinin texniki dəstəyi ilə keçirilmiş sorğu, Azərbaycanın 4 bölgəsində pediatr və vaksinatorlarla, valideyn və digər himayəçilərlə və mərkəzi/regional səviyyədə maraqlı tərəflər daxil olmaqla fokus qruplarla ətraflı müsahibələr şəklində baş tutub.

 

Tədqiqatın əsas məqsədi uşaqların vaksinasiyası ilə bağlı mövcud olan maneələr və təşviqedici amilləri öyrənməklə peyvəndlərlə əhatə dairəsi aşağı olan regionlar üçün tədbirlər planının hazırlanmasına dəstək verməkdən ibarətdir.

 

Sorğunun nəticələrinin paylaşılması üçün keçirilən seminarda ÜST-nin mütəxəssisi Bret Greq tərəfindən vaksinasiyaya maneələrlə bağlı tədqiqatın nəticələri və müəyyən edilmiş maneələri aradan qaldırmaq üçün tövsiyələr təqdim edilib.