Maarifləndirici seminar: “Serebral iflicə yanaşma”
31.05.2023 14:13
Klinik Tibbi Mərkəzin (KTM) nəzdində fəaliyyət göstərən Uşaq Bərpa Mərkəzində “Serebral iflicə yanaşma” mövzusunda maarifləndirici seminar keçirilib.
 
KTM-dən Aztibb.az-a verilən xəbərə görə, seminar Azərbaycan Respublikası Prezidentinin Sərəncamı ilə təsdiq edilmiş “Uşaqlıq dövrünə xas olan əlilliyin erkən profilaktikası və müalicəsi üçün milli fəaliyyət planı” çərçivəsində təşkil edilib.
 
Maarifləndirici tədbirin əsas məqsədi serebral iflic olan uşaqların valideynlərinə serebral iflicin səbəbləri, gedişatı, müalicə və müdaxiləsi haqqında ətraflı məlumat vermək, uşağın hərəkət funksiyalarının yaxşılaşdırılması üçün onun düzgün vəziyyətdə olmasını, passiv və aktiv məşğələlərdən gündəlik ev şəraitində istifadə edilməsinin praktiki öyrənilməsidir.
 
Seminar Uşaq Bərpa Mərkəzinin həkim-nevroloqu Təranə Seyid-Məmmədova və baş tibb bacısı Səminə Hüseynova tərəfindən keçirilib.
ÇOX OXUNANLAR