Gəncə Şəhər Birləşmiş Xəstəxanasının (ŞBX) təşkilatçılığı ilə Gəncə Dövlət Filarmoniyasında “Heydər Əliyev İli” çərçivəsində 1 iyun - Uşaqların Beynəlxalq Müdafiəsi Gününə həsr edilmiş pediatrik konfrans təşkil edilib.

 

Aztibb.az-a Gəncə ŞBX-dan verilən xəbərə görə, ilk olaraq Ulu Öndər Heydər Əliyevin və torpaqlarımızın işğaldan azad edilməsi uğrunda şəhidlik zirvəsinə ucalan qəhrəmanlarımızın xatirəsi bir dəqiqəlik sükutla yad edilib. Sonra Ümummilli Liderin həyat və fəaliyyətindən bəhs edən sənədli film nümayiş etdirilib.

 

Konfransı giriş sözü ilə açan Gəncə ŞBX-nin direktoru İlkin İsmayılov iştirakçıları salamlayaraq tədbirin əhəmiyyətindən bəhs edib.

 

Tədbirdə Gəncə ŞBX-nin, Gəncə Beynəlxalq xəstəxanasının həkimləri ilə yanaşı paytaxt Bakıdan dəvət edilmiş mütəxəssislər də məruzələrlə çıxış ediblər.

 

Konfrans ayrı-ayrı panellərdə öz işini davam etdirib. Panel iclaslarında “Erkən qidalanmanın uzunmüddətli proqramlaşdırma təsiri”, “Mikrobiom niyə sağlamlıq üçün bu qədər vacibdir?”, “Səpki ilə müşahidə edilən xəstəliklərin differensial diaqnostikası”, “Yenidoğulmuşlarda sarılığın interpretasiyası”, “Uşaqlarda xroniki öskürəyə müasir yanaşma, müalicə alqoritmlərinin klinik əhəmiyyəti”, “Uşaqlarda orta otitlər”, və digər mövzularda məruzələr dinlənilib.

 

Qeyd edək ki, tədbir Gəncə şəhər Səhiyyə İşçiləri Həmkarlar İttifaqı Şurasının dəstəyi ilə baş tutub.