Son zamanlar vaxtsız və qəfləti baş verən ölümlərin sayı artıb. Bunların əksəriyyəti tromblarla əlaqələndirilir.

Bu barədə Aztibb.az-a Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.

Həkim bildirib ki, qanın damar daxilində və ya ürək boşluqlarında laxtalanması tromboz, bu zaman əmələ gələn qan laxtası isə tromb adlanır.

Onun sözlərinə görə, trombun yaranma səbəbi təkcə damar zədəsi deyil, həmçinin qanın laxtanma sürətinin artması, qan dövranında durğunluq ilə bağlı ola bilər:

"Əsas səbəblərdən biri də ürək damarlarının tutulmasıdır. Ürək damarları tutulduqda onların qidalandırdığı nahiyələr qansız qalır, yığılmır və yığılmayan yerdə tromb yaranır. Digər səbəb səyrici aritmiyadır. Onun nəticəsində qulaqcıqlarda tromb yaranır".

Cabir Gülmalıyev kimlərdə tromb riskinin yüksək olduğunu da açıqlayıb:

- artıq çəkili və piylənməsi olan şəxslərdə;
- ayaqlarına daha çox yük düşən şəxslərdə;
- uzun müddət hərəkətsiz və ya yataq rejimində olanlarda;
- sağlam həyat tərzi keçirməyənlərdə;
- uzun müddət hormon əvəzedici terapiya və ya doğuşa nəzarət həbləri qəbul edənlərdə (estrogen tərkibli);
- aşağı ətraflarda ortopedik, travmatoloji cərrahiyyə əməliyyatı keçirən insanlarda;
- dərin venatrombozu və ya ağciyər emboliyası tarixi olanlarda;
- xərçəng xəstələrində;
- irsi və yaqazanılmış qanın laxtalanma pozğunluğu olan şəxslərdə.

"Sağlam həyat tərzi keçirin və damar sağlamlığına qarşı diqqətli olun", - deyə uzman həkim bildirib.