Türk Beyin Layihəsi çərçivəsində inkişaf etdirilən real zamanlı süni intellekt sistemi ilə beynində şiş diaqnozu qoyulan xəstəyə təcili müdaxilə edilərək onun həyatı xilas edilib. Xəstə süni intellekt tərəfindən aşkarlanan və təcili müalicə olunan ilk klinik hadisə kimi tibb tarixinə düşüb.

Bu barədə Aztibb.az medimagazin.com.tr-yə istinadla xəbər verir.

Belə ki, Qazi Universiteti Tibb Fakültəsi Xəstəxanası Beyin və Sinir Cərrahiyyəsi Poliklinikasına qeyri-spesifik baş ağrısı şikayəti ilə müraciət edən qadın xəstədən həkim maqnit rezonans tomoqrafiyası (MRT) istəyib. Xəstə MRT cihazında olarkən real vaxt rejimində onun məlumatlarını analiz edən süni intellekt alqoritmi vasitəsilə şiş aşkarlandıqdan sonra təcili əməliyyata alınan xəstənin həyatı erkən müdaxilə ilə xilas edilib.

Bu hadisə "Journal of Neurosurgery: Case Lessons"da dərc edilib və süni intellekt alqoritmi ilə diaqnoz qoyulan ilk hal kimi tibbi ədəbiyyata daxil olub.