Ümumdünya Səhiyyə Təşkilatı (ÜST) Azərbaycan Respublikası Səhiyyə Nazirliyi ilə birgə əməkdaşlıq şərçivəsində Azərbaycanda ilk dəfə Birgə Xarici Qiymətləndirməni (BXQ) həyata keçirib.

 

Aztibb.az ÜST-nin Azərbaycan nümayəndəliyinə istinadla xəbər verir ki, BXQ çərçivəsində ÜST-nin mütəxəssisləri və beynəlxalq ekspertlərdən ibarət 13 nəfərlik heyət ölkənin məsul qurumları ilə birgə görüşlər və sahə səfərləri təşkil edib.

 

BXQ fövqəladə hallara qarşı hazırlıq səviyyəsinin müəyyən edilməsi, qiymətləndirilməsi və qarşısının alınması üçün lazım olan alətlərdən biridir. BXQ-nin keçirilməsində əsas məqsəd ölkədə fövqəladə hallara qarşı hazırlıq səviyyəsini müəyyən etmək, hədəflərin əlçatanlığını ölçmək və beynəlxalq tibbi-sanitariya qaydalarının tətbiqi ilə ölkədə səhiyyə potensialını gücləndirməkdir.

 

Sual-cavab formatında keçirilən görüşlərdə ekspert heyəti 19 sahədən ibarət olan alətin hər sahəsi üzrə hesabat və prioritet tövsiyələri hazırlayıb. Sahə səfərləri zamanı ekspert komandası qrup şəklində Səhiyyə Nazirliyi, TƏBİB, Fövqəladə Hallar Nazirliyinin Akademiyası və Böhran Mərkəzi, Dövlət Gömrük Komitəsinin Beynəlxalq Dəniz Limanı, Azərbaycan Qida Təhlükəsizliyi Agentliyi, Bakı Sağlamlıq Mərkəzi və digər səhiyyə müəssisələrini ziyarət edib.

 

Yekunda dövlət qurumlarının rəhbərliyinin iştirakı ilə BXQ nəticələri üzrə brifinq keçirilib.

 

Qeyd edək ki, Birgə Xarici Qiymətləndirmə ÜST-nin Səhiyyədə Fövqəladə Hallar Proqramının dəstəyilə həyata keçirilib.