Bakı Baş Səhiyyə Mərkəzində tabeli ailə sağlamlıq mərkəzlərinin tibb mərkəzləri ilə əlaqəli işinin təşkili, göstərilən tibbi xidmətlərin elektron qeydiyyat sisteminə daxil edilməsi zamanı yol verilən nöqsanların müzakirəsi və aradan qaldırılması mövzusunda təlim keçirilib.
Bu barədə Aztibb.az-a Mərkəzdən xəbər verilib.
Mərkəzin İxtisaslı tibbi xidmətlərin təşkili şöbəsinin müdiri Aytən Sultanova, Nərimanov Tibb Mərkəzinin Xəstə xidmətləri şöbəsinin müdiri Səfər Maqsudov tərəfindən keçirilən təlimdə TƏBİB-in tabeliyində fəaliyyət göstərən Suraxanı və Pirallahı Tibb Mərkəzlərinin nümayəndələri, Bakı Baş Səhiyyə Mərkəzinin tabeliyində fəaliyyət göstərən ailə sağlamlıq mərkəzlərinin sahə həkimləri, həkim-terapevtləri və həkim-pediatrları iştirak ediblər.
Nərimanov Tibb Mərkəzinin şöbə müdiri Səfər Maqsudov ailə sağlamlıq mərkəzlərində vətəndaşların müayinə və müalicə prosesi zamanı tibbi məlumatların elektron qeydiyyat sisteminə daxil edilməsi zamanı qarşıya çıxan nöqsanlar və onların həlli yollarını təlim iştirakçılarının diqqətinə çatdırıb, bu məsələlərin tibbi xidmətin keyfiyyətinin yüksəldilməsinə, vətəndaşların əlavə vaxt itkisinin aradan qaldırılmasına xidmət etdiyini vurğulayıb.
Təlimdə, həmçinin tibbi arayış, əməliyyat və digər tibbi xidmətlərə dair göndərişlərin verilməsi, onların elektron sistemə qeydiyyatı zamanı üzə çıxan çətinliklər təlim iştirakçılarının nəzərinə çatdırılıb, nöqsanların aradan qaldırılması ilə bağlı onlara ciddi tapşırıqlar verilib.
Sonda təlim iştirakçılarının sualları cavablandırılıb.
