Sərgidə Ümummilli Lider Heydər Əliyevin ölkəmizə rəhbərliyi dövründə Sumqayıta etdiyi 16 səfəri özündə əks etdirən fotolar sərgilənib.

 

STM-in direktoru Səkinə Sadıxova, direktor müavinləri İlkin Namazov, Arzu Bəndəliyeva, Maisə İsmayılova və tibb müəssisəsinin kollektivi sərgi ilə tanış olublar.

 

Direktor S. Sadıxova sərgini giriş nitqi ilə açaraq müasir Azərbaycan dövlətinin qurucusu, dünyaşöhrətli siyasi xadim Heydər Əliyevin mənalı ömür yolundan, xalqımız və dövlətimiz qarşısındakı misilsiz xidmətlərindən, xilaskarlıq missiyasından, respublikamızın hərtərəfli inkişafı naminə atdığı addımlardan, müdrik və uzaqgörən siyasətindən danışıb.

 

Sumqayıt şəhərinin Tarixi Muzeyinin direktor müavini Namiq Əliyev və Kütləvi ekspozisiyalar şöbəsinin müdiri Sevinc Əmirova Ulu Öndərin Sumqayıta etdiyi səfərləri barədə məlumat veriblər. Bildirilib ki, Heydər Əliyevin Sumqayıta ilk səfəri 1971-ci il aprelin 7-də, sonuncu səfəri isə 2003-cü ilin aprelin 3-də olmuşdur.

 

Qeyd olunub ki, dahi lider Heydər Əliyevin hər səfəri şəhərin tarixinə mühüm hadisə kimi yazılıb və yeni inkişaf mərhələsinin başlanğıcı olub.

 

Tədbirdə görkəmli şəxsiyyətin şəhərin sosial-iqtisadi inkişafında, sənayenin formalaşmasında, elmin, təhsilin, mədəniyyətin, səhiyyənin tərəqqisində əvəzsiz xidmətləri olduğu vurğulanıb.