Səhiyyə Nazirliyi və Ümumdünya Səhiyyə Təşkilatının (ÜST) Azərbaycan nümayəndəliyinin birgə təşkilatçılığı ilə nazirliyin 2 nömrəli Bakı Baza Tibb Kollecində 12 may - Beynəlxalq Tibb Bacısı Gününə həsr olunmuş tədbir keçirilib.
Bu barədə Aztibb.az-a Səhiyyə Nazirliyindən məlumat verilib.
Tədbirdə Azərbaycan səhiyyə nazirin səhiyyənin rəqəmsallaşdırılması üzrə müşaviri Rüfət Hacıəlibəyov, İnsan resursları şöbəsinin müdiri Səidə Rüstəmova, ÜST-nin Azərbaycan üzrə nümayəndəsi Hande Harmancı, həmçinin 2 nömrəli Bakı Baza Tibb Kollecinin müəllim-tələbə heyəti iştirak ediblər.
Toplantıda Səhiyyə Nazirliyi İnsan resursları şöbəsinin müdiri Səidə Rüstəmova çıxış edərək Vətən müharibəsi zamanı tibb bacılarının fədakarlığını qeyd edib. O, 44 günlük Vətən müharibəsində və müharibədən sonrakı reabilitasiya proseslərində tibb işçilərinin əzmkar əməyi ilə yüzlərlə qəhrəman döyüşçümüzün həyata qaytarıldığını qeyd edib.
Şöbə müdiri bildirib ki, müasir tibb bacılarının fəaliyyətləri kifayət qədər genişdir. Belə ki, patronaj tibb bacılarının yerlərdə verdikləri sosial məsləhətlər, valideynlərlə apardıqları maarifləndirmə işi həm səhiyyə, həm də sosial layihələrə dəstəkdir.
Öz növbəsində ÜST-nin Azərbaycan nümayəndəsi Hande Harmancı qeyd edib ki, tibb bacıları səhiyyə xidmətlərinin təminatında önəmli rol oynayır: “Güclü səhiyyə xidmətləri istəyiriksə, tibb bacıları institutuna sərmayə qoymalı, onları beynəlxalq standartlara uyğun yetişdirməli və lazımi resurslarla təmin etməliyik”.
Sonra çıxış edən 2 nömrəli Bakı Baza Tibb Kollecinin direktoru Dilarə Məmmədəliyeva vurğulayıb ki, tibb xidmətlərinin göstərilməsində tibb bacılarının və tibb qardaşlarının rolu əvəzsizdir. Direktorun sözlərinə görə, respublikamızda 56 mindən çox tibb bacısı və tibb qardaşı çalışır və öz vəzifə borcunu layiqincə yerinə yetirir. Onlar koronavirus epidemiyası ilə mübarizədə, eyni zamanda 44 günlük Vətən müharibəsinin istər ön, istər arxa cəbhədə öz vətəndaşlıq və vəzifə borclarını layiqincə yerinə yetirərək cəsarət, fədakarlıq, peşəkarlıq nümayiş etdirdilər.
Daha sonra ÜST-nin eksperti Sevgi Turan, həmçinin 2 nömrəli Bakı Baza Tibb kollecinin tələbələrinin məruzələri dinlənilib.
Tədbir 2 nömrəli Bakı Baza Tibb kollecinin tələbələrinin hazırladığı musiqili-bədii kompozisiya ilə davam edib.
