TƏBİB-in tabeliyindəki Qazax Müalicə Diaqnostika Mərkəzinin həkim briqadası tərəfindən Ulu Öndər Heydər Əliyevin anadan olmasının 100-cü ildönümünə həsr olunmuş silsilə tədbirlər çərçivəsində Qazax rayonun sərhəd kəndləri - Quşçu Ayrım və Məzəmin sakinləri üçün səyyar tibbi xidmət aksiyası keçirilib.
Xəstəxanadan Aztibb.az-a bildirilib ki, Quşçu Ayrım tibb məntəqəsində təşkil olunan aksiyada müxtəlif ixtisaslı həkimlər tərəfindən aparılmış sakinlər tibbi müayinədən keçiblər.
Aksiya zamanı həkim briqadası 40 nəfərdən çox sakini müayinə edib, nəticədən asılı olaraq onlara müvafiq tövsiyələr və tibbi məsləhətlər verilib, əməliyyata ehtiyacı olanlar isə Qazax Müalicə Diaqnostika Mərkəzinə dəvət ediliblər.
Səyyar tibbi müayinənin əsas məqsədi əhali arasında profilaktik müayinə mədəniyyətini, sağlam həyat tərzini təbliğ etmək, əsasən ucqar kəndlərdə yaşayan, xəstəxanalara gələ bilməyən vətəndaşlar üçün müayinələrin həyata keçirilməsini təşkil etməkdir.
Kənd sakinləri səyyar həkim briqadası tərəfindən müayinə və müalicə olunmalarını razılıqla qarşılayıb, bu qayğıya görə tədbirin təşkilatçılarına və səyyar həkim briqadasına minnətdarlıqlarını bildiriblər.
Qeyd edək ki, tibbi müayinə aksiyaları Qazax rayonun digər ucqar kəndlərində təşkil olunması nəzərdə tutulub.