TƏBİB-in tabeliyində fəaliyyət göstərən Xətai Tibb Mərkəzində Ulu Öndər Heydər Əliyevin 100 illiyinə həsr edilmiş tədbir keçirilib.
Tədbiri giriş sözü ilə Xətai Tibb Mərkəzinin direktoru Ələkbər Tağıyev açaraq, Heydər Əliyev şəxsiyyətindən, onun Azərbaycan dövlətçilik tarixində rolundan və misilsiz xidmətlərindən söhbət açıb. Bildirib ki, bu günkü qüdrətli Azərbaycan məhz Heydər Əliyev dühasının məhsuludur.
Sonra çıxış edən Mərkəzin Sosial tədbirlər şöbəsinin məsul şəxsi Ruslan Qasımov Heydər Əliyev şəxsiyyətinin gənclərə nümunə olduğunu vurğulayıb.
Səhiyyənin inkişafında Heydər Əliyevin xidmətlərindən söhbət açan həkim-terapevt Tofiq Şıxəliyev dahi liderin səhiyyənin özülünü qoyduğunu qeyd edib, möhtəşəm layihələrin uğurlu nəticələrindən danışıb.
Tədbir Ulu Öndər Heydər Əliyevin 100 illiyinə həsr olunmuş videoçarxın nümayişi ilə başa çatıb.