Azərbaycan Tibb Universitetində (ATU) Rusiya Federasiyasının Dağıstan Dövlət Tibb Universiteti və Özbəkistanın Buxara Dövlət Tibb İnstitutunun nümayəndə heyətləri ilə görüş keçirilib.

 

Bu barədə Aztibb.az-a ATU-dan xəbər verilib.

 

Görüşdə çıxış edən ATU-nun elmi işlər üzrə prorektoru, professor Rauf Bəylərov qonaqlara ölkəmizdə tibb üzrə ali təhsilin strukturu, universitetin tarixi və fəaliyyəti haqqında mılumat verib. Bildirib ki, Azərbaycan Tibb Universiteti 1930-cu ildə Bakı Dövlət Universitetinin tibb fakültəsinin bazası əsasında yaradılıb. ATU-nun hazırda mövcud olan 4 klinikası ilə yanaşı, 6 tədris binası, inzibati binası, 1700 yerlik 6 tələbə yataqxanası vardır. Təkcə 11 mərtəbəli müasir tipli tədris binası 2500 tələbəni qəbul etmək imkanına malikdir. Burada universitetin bir sıra nəzəri kafedraları, internet mərkəzi, 1 milyona yaxın kitab ehtiyatı olan kitabxanası fəaliyyət göstərir.

 

Professor Rauf Bəylərov  qeyd edib ki, universitet 3 ixtisası Akkreditasiya və Reytinq üzrə Müstəqil Agentliyin akkreditasiyasını keçib. Xarici tələbə sayına görə də universitetimiz birinci yerdədir.

 

Rusiya Federasiyasının Dağıstan Dövlət Tibb Universitetinin Elmi işlər üzrə prorektoru Naidə Mollayeva təmsil etdiyi ali təhsil müəssisəsi haqqında məlumat verərək ATU ilə qarşılıqlı əlaqələrin inkişafinda maraqlı olduqlarını bildirib.

 

Görüşdə Rusiya Federasiyasının Dağıstan Dövlət Tibb Universitetinin Strateji inkişaf üzrə prorektoru Cəmilə Ömərova, Beynəlxalq əlaqələr şöbəsinin müdiri Səcidə Hacəliyeva, Özbəkistanın Buxara Dövlət Tibb İnstitutunun Gənclərlə iş, maarifləndirmə və mənəviyyat üzrə birinci prorektoru Zübeydə Bəhranova və Stomatologiya fakültəsinin dekan müavini Mamura Afakova, həmçinin ATU-nun Beynəlxalq əlaqələr üzrə prorektoru, dosent Orxan İsayev, Beynəlxalq əlaqələr şöbəsinin müdiri, dosent Müşfiq Həsənov, Mətbuat Xidmətinin rəhbəri Günel Aslanova iştirak ediblər.

 

 

Qeyd edək ki, nümayəndə heyətinin üzvləri ATU-nun Tədris Cərrahiyyə Klinikasını da ziyarət edərək burada yaradılan şəraitlə tanış olublar.