KTM-dən Aztibb.az-a bildirilib ki, əvvəlcə Ulu Öndər Heydər Əliyevin xatirəsini bir dəqiqəlik sükutla yad edib.

 

Tədbiri giriş sözü ilə açan 2 saylı Klinik Uşaq Xəstəxanasının baş həkimi Azər Xuduyev Ümumilli Lider Heydər Əliyevin həyat yolundan danışıb, onun uzaqgörən siyasətinə diqqət çəkib. Baş həkim qeyd edib ki, Ulu Öndərin hakimiyyətə gəlişi ilə Azərbaycanda çiçəklənmə dövrü başlayıb. Heydər Əliyevin hakimiyyətə gəlişindən sonra Azərbaycanın həm daxili, həm də xarici siyasətində güclənmə olduğunu diqqətə çatdırıb.

 

Daha sonra çıxış edən Kliniki Tibbi Mərkəzin direktoru Könül Ələkbərov Ümummilli Lider Heydər Əliyevin yaşadığı mənalı və kamil ömür yolundan, xalq və dövlətçilik uğrunda apardığı mübarizədən danışıb. O, həmçinin Ulu Öndərin Azərbaycanın səhiyyə sistemindəki rolundan, demokratik, hüquqi dövlət quruculuğundan, xalqın rifahının yüksəlməsində atılan misilsiz addımlardan danışıb.

 

Könül Ələkbərov qeyd edib ki, 1994-cü ildən bəri Azərbaycanda 70-ə yaxın xəstəxana yenidən tikilib. Yüzlərlə xəstəxana isə əsaslı təmir olunub. Azərbaycanın ucqar rayonlarında belə ən müasir xəstəxanalar inşa edilib. Bunların hər birinin memarının Heydər Əliyev olduğunu vurğulayıb.

 

Direktor  bildirib ki, Ulu Öndər Heydər Əliyevin Azərbaycanın gələcəyinə hesablanmış siyasətini yeni müstəvidə dövrün tələblərinə uyğun şəkildə davam etdirən cənab Prezident İlham Əliyevin rəhbərliyi ilə ölkəmiz hərtərəfli inkişaf edib.

 

Tədbirdə çıxış edən Yeni Azərbaycan Partiyasının Nəsimi rayon təşkilatının sədri Azər Süleymanov da Ümumilli Lider Heydər Əliyevin hakimiyyəti dövründən, onun həyat yolundan bəhs edib. Azər Süleymanov diqqətə çatdırıb ki, həmin dövrdə ölkəmizin sürətli inkişafı ulu öndərin fenomenal iş qabiliyyətinin nəticəsidir: “Ulu Öndər Heydər Əliyev ilk dəfə hakimiyyətə gələndə Azərbaycan Əfqanıstanı xatırladırdı. Həmin dövrdə Azərbaycan bir kənd təsərrüfatı ölkəsi idi və səhiyyə, təhsil sahələrində çox zəif nəticələrə sahib idi. Amma ulu öndərin həmin dövrdə atdığı addımlar, gördüyü çox böyük işlər sayəsində artıq 1982-ci ildə ulu öndər Moskvaya gedəndə Azərbaycan 15 respublikanın içində ilk sıralarda yer tuturdu. Ölkəmizin bu cür sürətli inkişafı ulu öndərimizin fenomenal iş qabiliyyətinin, onun gecə-gündüz çalışmasının nəticəsi idi”.

 

Daha sonra tədbir Ə.F.Qarayev adına 2 saylı Klinik Uşaq Xəstəxanasının həkimləri Əzim Nağdəliyev və Şəbnəm Cəfərovanın çıxışı ilə davam edib.