1-5 may 2023-cü il tarixlərində Ümumdünya Səhiyyə Təşkilatının (ÜST) Avropa Regional Ofisinin təşkilatçılığı ilə Amerika, Filippin, Danimarka, İtaliya, Hollandiya və digər ölkələrdən gələn beynəlxalq ekspertlər tərəfindən ölkəmizdə Beynəlxalq-Tibbi Sanitariya Qaydalarına əsasən Birgə Xarici Qiymətləndirmə (BXQ) həyata keçirilib.

 

Bu barədə Aztibb.az-a Mərkəzi Gömrük Hospitalından bildirilib.

 

Qiymətləndirmənin məqsədi ölkədə ictimai səhiyyədə fövqəladə hallara qarşı hazırlıq səviyyəsinin müəyyən edilməsi və hədəflərin əlçatanlığını ölçmək, Beynəlxalq Tibbi-Sanitariya Qaydalarının (BTSQ) tətbiqində ölkənin potensialın gücləndirilməsi prosesinə dəstək olmaq, ölkə üzrə BTSQ çərçivəsində milli planın hazırlanmasında beynəlxalq təcrübəyə əsaslanmış tövsiyələr vermək olub.

 

Monitorinqlər zamanı ÜST, beynəlxalq ekspertlər və müvafiq Dövlət Qurumların nümayəndələri ilə birlikdə sahə səfərləri edilib, Qurumların rəhbərliyi ilə BXQ üzrə brifinq keçirilib. Dövlət Gömrük Komitəsinin Bakı Beynəlxalq Dəniz Ticarət Limanında yerləşən gömrük postuna edilən səfər zamanı beynəlxalq ekspertlər tərəfindən Dövlət Gömrük Komitəsinin Tibbi Xidmət İdarəsi, Gömrük Postu və Dəniz Limanının rəhbərliyi ilə birlikdə monitorinq aparılıb, postda həyata keçirilən əks-epidemik və ilk yardım tədbirləri barəsində ekspertlərə ətraflı məlumat verilib.

 

Tədbir zamanı Dövlət Gömrük Komitəsinin Tibbi Xidmət İdarəsinin əməkdaşları tərəfindən təqdimatlar edilmişdir. Təqdimatlarda Tibbi Xidmət İdarəsinin Sanitar Karantin Xidmətinin yaradılması, vəzifələri və fəaliyyəti, gördüyü işlər, gömrük sərhəd buraxılış məntəqələrində ictimai səhiyyə sahəsində baş verə biləcək hadisələrlə bağlı aparılan tədbirlər barədə iştirakçıları ətraflı məlumatlandırıblar.

 

Qiymətləndirmədə DGK Tibbi Xidmət İdarəsinin rəis müavini Şahlar Mirqasım, Sanitar-Karantin Xidmətinin rəisi Məhərrəm Nəbiyev, DGK-nın Baytarlıq, Fitosanitar və Sanitariya nəzarəti şöbəsinin rəisi Günay Salamova, Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB), Fövqəladə Hallar Nazirliyi, Qida Təhlükəsizliyi Agentliyi və digər qurumların nümayəndələri iştirak ediblər.