Ümumilli Lider Heydər Əliyevin anadan olmasının 100 illik yubileyinə həsr olunan Azərbaycan Uroloq və Androloqlarının Regional Sumqayıt Toplantısı keçirilib.

 

Sumqayıt Tibb Mərkəzindən (STM) Aztibb.az-a verilən məlumata görə, tədbir Səhiyyə Nazirliyinin, TƏBİB-in, Azərbaycan Urologiya Assosiasiyasının (AUA), Andrologiya və Reproduktiv Təbabət Assosiasiyasının (ARTA) və STM-in birgə təşkilatçılığı ilə baş tutub.

 

Müxtəlif tibb müəssisələrində çalışan 100-ə yaxın uroloq, androloq ginekoloqlar və digər ixtisas sahiblərinin qatıldığı konfrans “Sidik daşı xəstəliyi” mövzusuna həsr olunub.

 

Əvvəlcə Dövlət Himni səsləndirilib.

 

Açılış nitqi ilə çıxış edən görkəmli uroloq-alim, Azərbaycan Tibb Universitetinin Urоlоgiyа kаfedrаsının müdiri, AMEA-nın müxbir üzvü Südeyif İmamverdiyev iştirakçıları salamlayıb və konransın işində uğurlar arzulayıb. O, Ulu Öndərin Azərbaycanın bütün sahələrdə inkişafında göstərdiyi əvəzsiz xidmətlərdən bəhs edib.

 

Sonra ATU-nun Tədris Cərrahiyyə Klinikasının Urologiya kafedrasının professoru, ARTA-nın sədri İlham Əhmədov müzakirə olunacaq məsələləri konfrans iştirakçılarının diqqətinə çatdırıb.

 

TƏBİB-in İxtisaslı tibbi yardım departamentinin rəhbəri Teymur Mirzəbəyli çalışdığı qurumun xəstəliklərlə mübarizə sahəsində əldə etdiyi uğur və nailiyyətlərdən danışıb. T.Mirzəbəyli tibbin müxtəlif sahələri üzrə mütəxəssislərin iştirakı ilə keçirilən bu kimi konfransların qarşılıqlı fikir və təcrübə mübadiləsində mühüm əhəmiyyət kəsb etdiyini vurğulayıb.

 

Sumqayıt Tibb Mərkəzinin direktoru Səkinə Sadıxova isə çıxışında rəhbərlik etdiyi qurumun fəaliyyətindən, "Heydər Əliyev İli" çərçivəsində keçirilən tədbirlərdən söz açıb və bu kimi tədbirlərin il ərzində davam etdiriləcəyini konfrans iştirakçılarının diqqətinə çatdırıb.

 

Daha sonra konfrans iştirakçıları Ulu Öndərin həyat yoludan bəhs edən videçarxı izləyiblər.

 

Akademik M.Cavadzadə adına Respublika Kliniki Uroloji Xəstəxanasının həkim-uroloqu Elçin Mustafayev “Perkutan cərrahiyyədə təcrübəm”, uroloq-androloq Mansur Xəlilov “İntrarenal cərrahiyyə nə qədər üstündür?”, Kliniki Tibbi Mərkəzin Urologiya şöbəsinin müdiri, həkim-uroloq Araz İbrahimov “Mərhələ-mərhələ URS”, uroloq-androloq Niyammədin Əliyev “Anomalik böyrəklərdə perkutan nefrolitotomiya” mövzularında təqdimatla çıxış ediblər.

 

STM-in 1 nömrəli Şəhər Xəstəxanasınn baş həkimi, həkim-uroloq Mətləb Musayev isə çıxışında Sumqayıtda uroloji xidmətin vəziyyətinə toxunub, rəhbərlik etdiyi xəstəxananın urologiya şöbəsində həyata keçirilən əməliyyatlardan, gələcək pespektivlərdən bəhs edib.

 

Akademik M. Cavadzadə adına Respublika Kliniki Uroloji Xəstəxananın Uşaq urologiyası şöbəsinin müdiri, tibb elmləri üzrə fəlsəfə doktoru Rafael Soltanov “Uşaqlarda daş xəstəliklərinin müalicəsinə endoskopik yanaşma”dan, ATU-nun II mamalıq-ginekologiya kafedrasının dosenti, cərrah mama-ginekoloq Şəymən Qədimova isə “Hamilə qadınlarda daş xəstəliyi”ndən danışıb.

 

Konfrans öz işini interaktiv müzakirələrlə yekunlaşdırıb.

 

Sonda tədbir iştirakçıları Fəxri fərmanlarla təltif ediliblər.