24-28 aprel 2023-cü il tarixdə Xorvatiyanin Zaqreb şəhərində Ümumdünya Səhiyyə Təşkilatının (ÜST) Avropa Regional Ofisi, ABŞ-nin Xəstəliklərə Nəzarət və Profilaktika Mərkəzi (CDC) və ABŞ Ştatları və Ərazilərinin Epidemioloqları Şurası tərəfindən “Tibbi araşdırmalar əsasında elmi məqalələrin yazılması və dərci üzrə İşçi Qrupunun təlimi” keçirilib.

 

İctimai Səhiyyə və İslahatlar Mərkəzindən (İSİM) Aztibb.az-a bildirilib ki, təlimdə Azərbaycan da daxil olmaqla, ABŞ, Danimarka, Avstriya, Albaniya, Serbiya, Moldova, Ukrayna və digər ölkələrdən mütəxəssislər, aparıcı tədqiqatçılar və mentorlar iştirak ediblər.

 

Təlimə İSİM-in Səhiyyə siyasəti və planlaşdırma şöbəsinin müdiri Nabil Seyidov da qatılıb. N,Seyidov Azərbaycanda İSİM tərəfindən iki ildir həyata keçirilən “Azərbaycanda səhiyyə işçiləri arasında COVID-19 və qripə qarşı vaksinasiyanın effektivliyinin dəyərləndirilməsi tədqiqatı”nın tədqiqatçılarından biri kimi Avropa və ABŞ-nin yüksək impakt faktorlu elmi tibbi jurnallarında məqalələrin dərc edilməsi sahəsində digər ölkələrdən olan həmkarları ilə təcrübələrini bölüşüb, ÜST və CDC-dən olan ekspert və jurnalların resenzentləri ilə birgə məqalələrin yazılması, statistik təhlil və dərci ilə bağlı fikir mübadiləsi aparılıb.

 

Qeyd edək ki, hazırda İSİM tərəfindən COVID-19 vaksinasiyası, uşaqlar arasında piylənmə, antibiotikə qarşı rezistentlik, xəstəxanadaxili infeksiyalar və ürək-damar xəstəliklərinin yükü ilə bağlı 5 tədqiqatın nəticələrinin dərci üzərində işlər aparılır.

 

Xatırladaq ki, son 2 il ərzində İSİM tərəfindən 7 məqalə milli və xarici jurnallarda dərc edilib, 2 nüfuzlu beynəlxalq konqresdə poster təqdimatlar olunub və elmi tədqiqatların təşviqi ilə bağlı xüsusi proqrama start verilib.