Elm və Təhsil Nazirliyinin Geologiya və Geofizika İnstitutunun Gənc Alim və Mütəxəssislər Şurası tərəfindən növbəti elmi seminar keçirilib.
İnstitutdan Aztibb.az-a verilən xəbərə görə, tədbirdə müəssisənin baş direktoru, akademik Akif Əlizadə və icraçı direktor AMEA-nın müxbir üzvü Dadaş Hüseynov iştirak ediblər.
Seminarı giriş sözü ilə açan institutun Gənc Alim və Mütəxəssislər Şurasının sədri Zöhrab Əliyev təqdimat üçün sözü doktorant Samir Zeynalova verib.
Samir Zeynalov “Müalicəvi Naftalan neftinin müasir üsullarla tədqiqinin nəticələri” mövzusunda təqdimatla çıxış edib. Məruzəçi unikal Naftalan nefti haqqında ümumi məlumat verib, sonra Naftalan yatağından alınmış üç fərqli xüsusiyyətli neftin müasir cihazlar vasitəsilə müqayisəli analizlərinin nəticələrini təqdim edib. Bildirib ki, Naftalan strukturu Arpa-Samur qırılma zonası daxilində yerləşir. Bu zona Paleozoydan indiyədək bütün dövrlərdə tektonik hərəkətlərin aktiv təzahürü zonası, maqmatik ərimələrin, filizli məhlulların və seysmikliyin keçiricisi olub.
Naftalan yatağında Maykop çöküntülərində keyfiyyətcə fərqli iki növ neftin olması faktı: müalicəvi ağır neft - üst Maykopun üst horizontlarında (I, mergel və II horizontlarda) və yüngül yanacaq nefti-üst Maykopun və alt Maykopun alt horizontlarında mövcud olduğunu isə Aərbaycanın geoloq alimləri də vaxtında sübut ediblər.
Gənc doktorantın təqdimatda səsləndirdiyi elmi mülahizələr iştirakçıların marağına səbəb olub. Həmçinin çoxsaylı suallara aydınlıq gətirilib, mövzu üzrə çıxışlar olub.
Akademik Akif Əlizadə çıxışında institutunun Gənc Alim və Mütəxəssislər Şurasının təşkil etdiyi elmi seminarların ənənə xarakteri almasını təqdirə layiq olduğunu bildirib və bu tədbirlərin təkmilləşdirməklə davamlı olmasını tövsiyə edib.
