"Dahi təbiblər" rubrikamızda dünyaşöhrətli cərrah-uroloq, keçmiş SSRİ və Azərbaycan Dövlət mükafatları laureatı, Azərbaycan Milli Elmlər Akademiyasının həqiqi üzvü Mirməmməd Cavadzadəni təqdim edirik:

 

Urologiya sahəsində olan bir çox yeniliklər - ölkəmizdə ilk dəfə hemodializ əməliyyatının, Cənubi Qafqazda ilk dəfə terminal böyrək köçürülməsi əməliyyatlarının aparılması, keçmiş ittifaqda ilk dəfə Bakıda uroloji xəstəxana açılması onun adı ilə bağlıdır.

 

Məşhur uroloq-cərrah Mirməmməd Cavadzadə 60 ilə yaxın tibbi fəaliyyətinin 34 ilində gördüyü işlər onun adının Azərbaycan səhiyyəsinə əbədi olaraq həkk edib. 

 

M.Cavadzadə 1927-ci il mayın 18-də Lənkəran şəhərində anadan olub. 1943-cü ildə 1 nömrəli Lənkəran şəhər orta məktəbini, 1948-ci ildə Azərbaycan Dövlət Tibb İnstitutunun Müalicə-profilaktika fakültəsini bitirib.

 

Mirməmməd Cavadzadə əmək fəaliyyətinə 1948-ci ildə Astara rayonunda cərrah kimi başlayıb, 1949–1950-ci illərdə Astara rayon poliklinikasında və xəstəxanasında baş həkimin müavini, 1950–1951-ci illərdə Lənkəranda yerləşən xəstəxanada cərrah kimi çalışıb.

 

1951-ci ildə II Moskva Tibb İnstitutundakı Urologiya kafedrasında aspirantura təhsili alıb, 1954-cü ildə "Sidik axarının daşları" mövzusunda namizədlik dissertasiyası müdafiə edib. 1954-cü ildən 1957-ci ilə qədər Krım Tibb İnstitutunda assistent, sonra urologiya üzrə dosent olmaqla, Krım vilayətinin baş uroloqu işləyib. 1962-ci ildə "Böyrəklərin polikistozu" mövzusunda doktorluq dissertasiyası müdafiə edərək tibb elmləri doktoru adı alıb. 1963-cü ildə Bakıya dəvət olunub və müsabiqə yolu ilə Ə.Əliyev adına Azərbaycan Dövlət Həkimləri Təkmilləşdirmə İnstitutunun Urologiya və operativ nefrologiya kafedrasına müdir seçilib. Doğma Azərbaycana qayıtdıqdan sonra o, yüksək səviyyəli elmi-klinik müəssisə yaradıb və bununla da müasir klinika məktəbinin, urologiya elmində yeni istiqamətin təməlini qoyub. M.Cavadzadənin rəhbərliyi ilə bir neçə xəstəxananın urologiya şöbələri birləşdirilib və bu, respublikada urologiyanın, onunla əlaqədar elmlərin inkişafına təkan verib.

1974-cü ildə görkəmli alim həmin institutun rektoru təyin olunub və ömrünün sonunadək bu instituta rəhbərlik edərək, 45 ərzində tibb kadrlarının hazırlanması və təkmilləşdirilməsi işinə öz layiqli töhfəsini verib.

 

M.Cavadzadə urologiyanın problemlərinə həsr edilən 34 monoqrafiya və dərs vəsaitinin, 700-dən artıq elmi məqalənin müəllifidir. Alimin əsərləri respublikamızda və onun hüdudlarından kənarda mütəxəssislər tərəfindən yüksək qiymətləndirilib. Onun rəhbərliyi altında 17 elmlər doktoru, 73 elmlər namizədi, yüzlərlə yüksək ixtisaslı uroloq-həkim yetişib.

 

1966-cı ildə məhz onun təşəbbüsü və iştirakı ilə Bakıda Respublika Klinik Uroloji Xəstəxanası yaradılıb. Qısa müddət ərzində urologiya sahəsində elmi və praktik fəaliyyətin mötəbər mərkəzinə çevrilən bu xəstəxana Azərbaycan səhiyyə sistemində xüsusi yer tutur. 1964-cu ildən professor, 1967-ci ildən Azərbaycan SSRİ əməkdar elm xadimi, AMEA-nın həqiqi üzvü seçilib.

 

Akademik Mirməmməd Cavadzadə 2008-ci il avqust ayında vəfat edib. I Fəxri xiyabanda dəfn olunub.

 

Qeyd edək ki, TƏBİB-in tabeliyindəki Akademik Mirməmməd Cavadzadə adına Respublika Kliniki Uroloji Xəstəxanası onun adını daşıyır.