TƏBİB-in dəstəyilə Bakı şəhərində Ulu Öndər Heydər Əliyevin anadan olmasının 100 illiyinə həsr edilən 6-cı Azərbaycan-Alman-Türk Tibb Konqresi və 8-ci Bakı Beynəlxalq Tibbi Treyninq Günləri çərçivəsində növbəti tədbir baş tutub.

Bu barədə Aztibb.az-a TƏBİB-dən məlumat verilib.

Tədbirdə TƏBİB-in İcraçı direktoru Vüqar Qurbanov, qurumun İcraçı direktorunun müavini Araz Nəsirov, Azərbaycan Respublikasının səhiyyə nazirinin müavini Nadir Zeynalov, Milli Məclisin Səhiyyə komitəsinin sədr müavini Rəşad Mahmudov, Özbəkistanın Səhiyyə Nazirliyinin nümayəndəsi Abrorcon Alicanov, Özbəkistan Respublikasının ölkəmizdəki fövqəladə və səlahiyyətli səfiri Bahrom Aşrafxanov, Azərbaycan Minimal İnvaziv Cərrahlar Cəmiyyətinin sədri Qurbanxan Müslümov və b. iştirak ediblər.

Tədbir Dövlət Himninin səsləndirilməsi ilə başlayıb, əbədiyaşar lider Heydər Əliyevə həsr edilən sənədli film nümayiş olunub.

Çıxış edən TƏBİB-in İcraçı direktoru Vüqar Qurbanov son illər ölkəmizdə bütün sahələrdə olduğu kimi, tibb sahəsində də aparılan islahatların göz önündə olduğunu bildirib.

V.Qurbanov tibb mütəxəssislərinin davamlı təhsilinin təşkilinin, xarici klinikalarla yerli xəstəxanalar arasında sazişlərin bağlanmasının, regionlarda yeni xəstəxana və tibb mərkəzlərinin açılmasının bunun bariz nümünələri olduğunu qeyd edib. O, cənub bölgəsində keçirilən 6-cı Beynəlxalq Tibb Konqresi və 8-ci Tibbi Treyninq Günlərinin regionlarda səhiyyənin inkişaf etdirilməsinə verilən xüsusi diqqətin təzahürü olduğunu vurğulayaraq, Avropadan gələn yüksək ixtisaslı mütəxəssislərin həkim, rezident və tələbə auditoriyalarında oxuduqları mühazirələrin, keçirdikləri master-klassların, müzakirələrin tibb sahəsinə önəmli töhfələr verdiyini ifadə edib.

Çıxış edən səhiyyə nazirinin müavini Nadir Zeynalov, Milli Məclisin Səhiyyə komitəsinin sədr müavini Rəşad Mahmudov, Özbəkistan Respublikasının ölkəmizdəki fövqəladə və səlahiyyətli səfiri Bahrom Aşrafxanov bugünkü tədbirin əhəmiyyətli tərəflərindən birinin də ümumilikdə Azərbaycandan olan 500-dən çox tibb işçisi ilə birlikdə Özbəkistan, Türkiyə və Almaniyadan təşrif buyuran 50–dən yuxarı ixtisaslı həkimin iştirak etməsi olduğunu qeyd ediblər.

Rəsmi hissə bitdikdən sonra tədbir “Qarın divarı cərrahiyyəsi”, “Minimal invaziv kolorektal cərrahiyyə bu gün”, “Asiyada piylənmə və metabolik cərrahiyyə”, “Təcili hallarda minimal invaziv cərrahiyyə”, “Piylənməsi olan xəstələrdə qastrik ballon implantasiyası”, “Erkən mərhələdə mədə xərçəngi üçün minimal invazik cərrahiyyə: texnika və nəticələr” mövzusunda plenar iclasla davam etdirilib.