Balakən Rayon Mərkəzi Xəstəxanasında görkəmli alim, akademik Zərifə Əliyevanın anadan olmasının 100 illiyi ilə əlaqədar tədbir keçirilib.

Xəstəxanadan Aztibb.az-a bildirilib ki, tədbiri giriş sözü ilə açan müəssisənin direktoru Dilbər Quliyeva bildirib ki, alimin oftalmologiyanın aktual məsələlərinə dair uzunmüddətli araşdırmalarının uğurlu nəticələri həmişə təqdirlə qarşılanmış və yüksək qiymətə layiq görülmüşdür.

Daha sonra həkim-oftalmoloq Şahidə Məmmədova akademik Zərifə Əliyevanın həyat və yaradıcılığı, tibb sahəsinin inkişafına əhəmiyyətli töhfələri barədə məlumat verib. Qeyd edib ki, Azərbaycanda oftalmologiya məktəbinin ilk tədqiqat mərkəzi olaraq ixtisaslaşdırılmış elmi tədqiqat laboratoriyası məhz akademik Zərifə Əliyevanın təşəbbüsü ilə yaradılmışdır.

Diqqətə çatdırılıb ki, görkəmli alimin həmin dövr üçün yeni sahələr olan tibbi etika və deontologiyaya dair tədqiqatları təkcə tibbə deyil, bütövlükdə cəmiyyətdə insanlar arasında münasibətlərə həsr edilmişdir. Zərifə xanım Əliyeva ölkəmizi keçmiş Sovetlər İttifaqında və onun hüdudlarından kənarda da oftalmologiya üzrə elmi tədqiqat işləri aparılan nüfuzlu mərkəzə çevirmişdir.

Həmçinin vurğulanıb ki, Zərifə Əliyeva həkimlik fəaliyyətinə başladığı ilk illərdən on minlərlə insanın görmə qabiliyyətinin bərpa olunmasında əvəzsiz rol oynamış, qlaukomanın yeni müalicə üsullarını təklif etməsi ilə minlərlə insanı bu xəstəlikdən xilas etmişdir. Zərifə xanım Əliyevanın çoxcəhətli elmi və tibbi fəaliyyəti təkcə öz dövrü üçün deyil, bu gün üçün də mühüm əhəmiyyət kəsb edir və aktuallığını qoruyur.