Gəncə Şəhər Birləşmiş Xəstəxanasının (ŞBX) Ailə Sağlamlıq Mərkəzlərində (ASM) "İmmunlaşdırma həftəsi" öncəsi maarifləndirmə tədbirlərinə start verilib.

Gəncə ŞBX-dan Aztibb.az-a bildirilib ki, bu məqsədlə ASM rəhbərləri, həkim-pediatrlar, Gəncə şəhər Gigiyena və Epidemiologiya Mərkəzinin şöbə müdiri, bağça müdirləri və tibb bacılarının iştirakı ilə yığıncaq keçirilib.

Qeyd olunub ki, peyvəndlər insan həyatı üçün təhlükəli olan, insan sağlamlığına ciddi ziyan vuran, ağır vəziyyətlərin əmələ gəlməsilə, hətta ölümlə nəticələnən 1 sıra xəstəliklərin inkişaf etməsinin qarşısını alan ən etibarlı müdafiə vasitəsidir. Peyvəndin tibbin ən böyük kəşflərindən biri hesab olunması diqqətə çatdırılıb.

Tədbirdə bildirilib ki, 24-30 aprel tarixlərində respublikanın bütün şəhər və rayonlarında “İmmunlaşdırma həftəsi” keçirilməsi ilə bağlı əmr imzalanıb.

İmmunlaşdırma kampaniyası peyvəndlərlə qarşısı alına bilən xəstəliklərdən uşaqların qorunmaq hüququ olması barədə əhalini məlumatlandırmaq, eyni zamanda peyvəndlə əhatəolunma səviyyəsini yüksəltmək məqsədi daşıyır.

İmmunlaşdırma proqramı dövlət tərəfindən dəstəklənir və peyvəndlərlə idarə olunan xəstəliklərin azalmasına yönəlib.