ABŞ-nin Ueyk Forest Regenerativ Tibb İnstitutunun alimləri osteoartritin müalicəsi üçün həm iltihabı azaldan, həm də oynaq qığırdaqlarını bərpa edən inyeksiya terapiyası yaradıblar.

Aztibb.az “Report”-a istinadla xəbər verir ki, araşdırmaların nəticələri “Science Advances” jurnalında dərc olunub.

Alimlər sağalma prosesinin zədələnmiş qığırdaqdakı iltihablı mühitin qarşısını aldığını təsdiqləyərək, bu mühiti dəyişdirən və qığırdağın bərpasına imkan verən terapiya hazırlayıblar. Bu vəziyyətdə iltihab, qığırdağın zədələnməsi azalır və ağrıya cavabdeh olan sinir hüceyrələrinin aktivliyi enir.

Terapiya hər biri bir və ya iki inyeksiya alan doqquz osteoartrit xəstəsi üzərində sınaqdan keçirilib. Effektivlik ağrı şkalası, müalicədən əvvəl və sonra MRT ilə qiymətləndirilib. Bundan başqa, bir xəstədən biopsiya götürülüb.

Müalicədən sonra xəstələrdə həyat keyfiyyətinin yaxşılaşması və ağrının azalması müşahidə olunub. Həmçinin MRT tədqiqatlarının nəticələri qığırdağın bərpa olunduğunu təsdiqləyib.

Mütəxəssislər daha çox xəstənin nəticələrini qiymətləndirmək üçün əlavə klinik araşdırmalara ehtiyac olduğunu bildiriblər.