TƏBİB-də İsrail Dövlətinin Səhiyyə Nazirliyinin Beynəlxalq əlaqələr üzrə Baş şöbəsinin meneceri Aşer Şalmonla görüş keçirilib.
Aztibb.az-a TƏBİB-dən bildirilib ki, görüşdə qurumun İcraçı direktorunun müavini Anar İsrafilov, İcraçı direktorun müşaviri Pərvin Əkbərov, tibbi sığorta və beynəlxalq əməkdaşlıq departamentlərinin rəhbərləri iştirak ediblər.
TƏBİB-in fəaliyyəti, səhiyyə idarəetməsi, icbari tibbi sığortanın tətbiqi və perspektivləri barədə qonaqlara məlumat verən Anar İsrafilov Azərbaycanla İsrail arasında bütün sektorlarda nümunəvi əməkdaşlığın mövcudluğunu vurğulayıb.
Ölkələr arasında son illər tibb, əczaçılıq sahələrində əlaqələrin genişləndiyini deyən A.İsrafilov İsrailin “Biopharmax” şirkəti ilə dərman vasitələri təchizatının optimallaşdırılması üçün effektiv tədbirlər həyata keçirildiyini və TƏBİB-in sözügedən şirkətlə əməkdaşlığının daha da genişləndiriləcəyini bildirib.
İsrail Dövlətinin Səhiyyə Nazirliyinin Beynəlxalq əlaqələr üzrə Baş şöbəsinin meneceri Aşer Şalmon ölkələr arasında bir çox sektorlarda, o cümlədən səhiyyə sahəsində də əlaqələrin daha da genişlənməsinə maraqlı olduqlarını vurğulayıb.
Aşer Şalmon tibbi heyətin bilik və bacarıqlarının daha da təkmilləşdirilməsi üçün onların təlimlərə cəlb edilməsi, tibb müəssisələrinin daha da innovativ idarəedilməsi və rəqəmsallaşdırılması istiqamətində birgə əməkdaşlığın faydalı olacağını ifadə edib.