TƏBİB-in dəstəyi ilə 17 may – Ümumdünya Arterial Hipertoniya ilə Mübarizə Günü və qeyri-infeksion xəstəliklərin profilaktikası üzrə Azərbaycanda maarifləndirici kampaniya keçirilir.

TƏBİB-dən Aztibb.az-a bildirilib ki, maarifləndirmə kampaniyası ilə əlaqədar mətbuat konfransı keçirilib.

Mətbuat konfransında TƏBİB-in Ümumi profilli tibbi yardımın təşkili şöbəsinin müdiri Kəmalə Ağayeva, Səhiyyə Nazirliyi İctimai Səhiyyə və İslahatlar Mərkəzinin (İSİM) direktoru Qəhrəman Haqverdiyev, İSİM-in Səhiyyə siyasəti və planlaşdırma şöbəsinin müdiri Nabil Seyidov, Azərbaycan Kardiologiya Cəmiyyətinin (AKC) sədri Üzeyir Rəhimov, “Servye Azərbaycan” şirkətinin direktoru Rişad Təhməzov və b. iştirak ediblər.

TƏBİB-in Ümumi profilli tibbi xidmətin təşkili şöbəsinin müdiri Kəmalə Ağayeva çıxışında müxtəlif qurumların birgə əməkdaşlığı ilə təşkil olunan maarifləndirici kampaniyanın vacibliyini qeyd edib:

“Arterial hipertenziyanın nəzarət dərəcələri dünyada zəif olaraq qalır və bütün Avropada qənaətbəxş deyil. Nəticə etibarilə hipertoniya qlobal miqyasda və ölkəmizdə ürək-damar xəstəliklərinin, eləcə də digər ölüm hallarının əsas səbəblərindən biridir. Hipertoniyanın erkən aşkarlanmasının uzunmüddətli perspektivdə sağlamlıqla əlaqəli xərclərə müsbət təsir göstərə biləcəyi və hospitalizasiya ehtiyacını azaltmaqla sağlamlıq nəticələrini yaxşılaşdıra biləcəkdir.

Maarifləndirmə kampaniyasında əsas məqsəd əhalini arterial hipertenziya xəstəliyi və bu xəstəliyin mümkün ağırlaşmaları haqqında maarifləndirmək, qan təzyiqinin ölçülməsinin əhəmiyyətini vurğulamaqdır. Düşünürəm ki, hipertenziyaya səbəb olan risk faktorları və xəstəliyin mövcudluğu barədə məlumatlılığın artırılması nəticəsində müalicənin effektivliyi yüksələcək və ağırlaşmaların inkişafının qarşısı müəyyən dərəcədə alınacaqdır”.

Konfransda İSİM-in direktoru Qəhrəman Haqverdiyev, İSİM-in Səhiyyə siyasəti və planlaşdırma şöbəsinin müdiri Nabil Seyidov, Azərbaycan Kardiologiya Cəmiyyətinin (AKC) sədri Üzeyir Rəhimov, “Servye Azərbaycan” şirkətinin direktoru Rişad Təhməzov da çıxış ediblər.

Sonda kütləvi informasiya vasitələrinin nümayəndələrinin sualları cavablandırılıb.