Dövlət Gömrük Komitəsinin müvafiq sərəncamına əsasən “Psixotrop maddələr, yeni növ sintetik narkotik vasitələr, hallüsinogenlər və prekursorlar” mövzusunda növbəti təlim Qərb Ərazi Baş Gömrük İdarəsində baş tutub.

 

Mərkəzi Gömrük Hospitalından Aztibb.az-a bildirilib ki, təlim zamanı Dövlət Gömrük Komitəsinin Tibbi Xidmət İdarəsinin mütəxəssisləri tərəfindən “Narkotik vasitələr və psixotrop maddələr: müasir dünyanın qlobal çağırışı”, “Çağdaş dövrdə psixotrop dərmanların yaratdığı problemlər” və “Saxta dərman vasitələri və onların yayılmasına qarşı mübarizə” mövzularında təqdimatlar edilib.

 

Daha sonra mövzu üzrə auditoriyanı maraqlandıran suallar cavablandırılıb.

 

Təlimdə Qərb Ərazi Baş Gömrük İdarəsinin Baş İdarə Rəisinin müavini, gömrük xidməti polkovniki Məhəmməd Qasımov, Dövlət Gömrük Komitəsinin Akademiyasının Əlavə təhsil şöbəsinin böyük mütəxəssisi, gömrük xidməti leytenantı Yavər Məmmədova, Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin mütəxəssisləri gömrük xidməti baş leytenantı Azad Əhmədov və gömrük xidməti leytenantı Şəhla Mirzəzadə, o cümlədən Qərb Ərazi Baş Gömrük İdarəsinin əməkdaşları iştirak ediblər.