TƏBİB-in Təcili tibbi xidmətlərin təşkili şöbəsinin əməkdaşları tərəfindən Bakı şəhərində yerləşən Təcili və Təxirəsalınmaz Tibbi Yardım (TTTY) bölmələrinə baxış keçirilib.

 

Aztibb.az-a TƏBİB-dən bildirilib ki, Bakı şəhərində hazırda fəaliyyət göstərən 21 TTTY bölməsi ilə yanaşı, şəhər kənarənda yerləşən Ələt, Qobustan, Lökbatan, Suraxanı, Zirə, Pirallahı və s. qəsəbələrdə bölmələrin ümumilikdə 20 filialı tərəfindən əhaliyə təcili tibbi yardım xidməti göstərilir.

 

Səfərlər zamanı TTTY bölmələrinin rəhbər heyəti, kollektiv üzvləri ilə görüşlər keçirilib, TƏBİB-in strateji istiqamətləri haqda maarifləndirici söhbətlər aparılıb.

Eyni zamanda, TTTY bölmələrinin yerləşdiyi binalara və təcili tibbi yardım avtomobillərinə baxış keçirilib.

 

Qeyd edək ki, TƏBİB-in TTTY bölmələrində müasir təchizatlı “Mercedes”, “Ford”, “Fiat” markalı səyyar və reanomobil, kütləvi xəsarətlər zamanı 6 xəstəni eyni zamanda daşıya bilən, yenidoğulmuş uşaqların təxliyəsi üçün neonatal və yolsuzluq şəraitində hərəkət edə bilən “Offroader” tipli ambulanslar xidmət göstərir.

Həmçinin TƏBİB tərəfindən avtomobillərin yenilənməsi, təchizatın təkmilləşdirilməsi və tibb personalının bilik, bacarıqlarının artırılması istiqamətində intensiv tədbirlər görülməkdədir.