TƏBİB-in təşkilatçılığı və dəstəyi ilə "Yeni Klinika"da Ümumdünya Hemofiliya Gününə həsr edilən "Hemofiliyanın müalicəsinin qlobal standartlara uyğunlaşması” mövzusunda elmi konfrans keçirilib.

 

Bu barədə Aztibb.az-a TƏBİB-dən məlumat verilib.

 

Konfransda TƏBİB-in İcraçı direktorunun müşaviri Pərvin Əkbərov, TƏBİB-in İxtisaslı tibbi yardımın təşkili departamentinin rəhbəri Teymur Mirzəbəyli, İcbari Tibbi Sığorta üzrə Dövlət Agentliyinin Tibbi planlama departamentinin rəhbəri Hikmət İbrahimli, Hemofiliyalı Xəstələrin Respublika Assosiasiyasının sədri Ayaz Hüseynov, Respublika Klinik Xəstəxanasının direktoru Elviz Qasımov və b. iştirak ediblər.

 

Tədbirdə Hemofiliyalı Xəstələrin Respublika Assosiasiyasının sədri Ayaz Hüseynov 2020-2023-cü illər üzrə Assosiasiyasının dövlət səhiyyə qurumları ilə əməkdaşlığı və əldə edilən nailiyyətlər haqqında məlumat verib.

 

Daha sonra TƏBİB-in İcraçı direktorunun müşaviri Pərvin Əkbərov “Hemofiliyada əzələ-skelet sisteminin müalicəsi” mövzusunda təqdimatla çıxış edib, iştirakçıların suallarını cavablandırıb.

 

Elmi konfransda Azərbaycanın aparıcı mütəxəssisləri hemofiliya və qanın digər laxtalanma pozğunluğundan əziyyət çəkən vətəndaşların müalicəsinə müasir multidisiplinar yanaşmalar barədə məruzələrlə çıxış ediblər.

 

Qeyd edək ki, konfransa ümumilikdə 280-dən çox iştirakçı qatılıb.