Səhiyyə Nazirliyinin 2 nömrəli Bakı Baza Tibb Kollecində görkəmli oftalmoloq-alim, akademik Zərifə xanım Əliyevanın 100 illik yubileyinə həsr olunmuş tədbir keçirilib.
Aztibb.az-a Səhiyyə Nazirliyindən bildirilib ki, tədbirdə Yasamal Rayon İcra Hakimiyyətinin başçısı Elşad Həsənov, Səhiyyə Nazirliyi İnsan resursları şöbəsinin müdiri Səidə Rüstəmova, 1 nömrəli Bakı Tibb Kollecinin direktoru Nailə Əliyeva, 2 nömrəli Bakı Baza Tibb Kollecin müəllim və tələbə heyəti, akademik Zərifə xanım Əliyeva adına Milli Oftalmologiya Mərkəzinin əməkdaşları və digərləri iştirak ediblər.
Tədbirdə 2 nömrəli Bakı Baza Tibb Kollecinin direktoru Dilarə Məmmədəliyeva akademik Zərifə Əliyevanın elmi fəaliyyətinin zəngin və əhatəli olduğunu vurğulayıb. Bildirib ki, Zərifə xanımın alim kimi qazandığı böyük uğurlar Azərbaycan tibb elminin tarixində ayrıca bir mərhələ təşkil edir.
Sonra Milli Oftalmologiya Mərkəzinin əməkdaşı Nübar Həşimova və 2 nömrəli Bakı Baza Tibb Kollecinin “Göz xəstəlikləri” fənn müəllimi Aynur Səfixanova Zərifə xanımın həyat və yaradıcılığı ilə bağlı məruzələrlə çıxış ediblər.