Uzun illərdir Sumqayıt səhiyyəsinin uğurları üçün çalışan Sumqayıt Tibb Mərkəzinin 3 nömrəli Şəhər Xəstəxanasının həkim-cərrahı, “Şöhrət” ordenli Vaqif Qəhrəmanov xidmətdə olmanın son yaş həddinə çatdığına görə təqaüdə çıxıb.

 

Bu barədə Aztibb.az-a STM-dən xəbər verilib.

 

Bildirilib ki, 1968-ci ildə Sumqayıtda 1 saylı Birləşmiş Xəstəxanada həkim-cərrah kimi fəaliyyətə başlayan Vaqif Qəhrəmanov şəhərdə fəaliyyət göstərən müxtəlif tibb müəssisələrində çalışıb. Bununla yanaşı, o, baş həkim, eləcə də 13 il Sumqayıt Səhiyyə şöbəsinin müdiri işləyib. 2015-ci ildən isə 3 nömrəli Şəhər Xəstəxanasında həkim-cərrah kimi fəaliyyətini davam etdirib.

 

Vaqif Qəhrəmanov 6 elmi məqalənin və 1 ixtiranın müəlifidir.

 

O, 2009-cu ildə Azərbaycan Respublikasının Prezidenti İlham Əliyevin Sərəncamı ilə “Şöhrət” ordeni ilə təltif olunub.

 

İşlədiyi müddət ərzində Vaqif Qəhrəmanov tutduğu vəzifə borcunu vicdanla yerinə yetirib, səhiyyə sistemində və ictimai işlərdə yaxından iştirak edərək kollektivin və şəhər ictimaiyyətinin hörmətini qazanıb.