Aprelin 13-də Azərbaycan Tibb Universitetində (ATU) ümummilli lider Heydər Əliyevin anadan olmasının 100 illiyinə həsr edilmiş beynəlxalq konqresin açılışı olub.

Səhiyyə Nazirliyindən Aztibb.az-a verilən məlumatda bildirilir ki, əvvəlcə konqres iştirakçıları Ulu Öndərin büstü önünə gül dəstələri qoyublar.

Tədbirdə ilk olaraq Azərbaycan Respublikasının Dövlət Himni səsləndirilib.

Konqresdə açılış nitqi ilə çıxış edən universitetin rektoru, professor Gəray Gəraybəyli 2023-cü ilin “Heydər Əliyev İli” elan edildiyini və tariximizdə silinməz iz qoyan, Azərbaycanın ən parlaq və tanınmış siması olan dahi şəxsiyyət, uzaqgörən siyasi liderin 100-cü ildönümünün bütün ölkə üzrə qeyd olunduğunu bildirib.

Ulu Öndərin səhiyyə sahəsində başladığı islahatların bu gün ölkə başçısı İlham Əliyev tərəfindən uğurla davam etdirildiyini vurğulayan rektor, son illər ərzində Azərbaycanda səhiyyə sisteminin təkmilləşdirilməsi istiqamətində mühüm işlərin görüldüyünü, geniş islahatların aparıldığını bildirib.

Daha sonra Bakı Dövlət Universitetinin rektoru Elçin Babayev çıxış edərək bildirib ki, Azərbaycan xalqının ümummilli lideri, müstəqil Azərbaycan dövlətinin memarı, görkəmli siyasi və dövlət xadimi Heydər Əliyev şəxsiyyətinin xalqımızın həyatında, müstəqil dövlətimizin tarixində misilsiz yeri və rolu var: “Şərəflə yaşadığı ömrünün təxminən 35 ilini Azərbaycana rəhbərlik edən, müstəqil Azərbaycanın qurucusu olan, əbədiyaşarlıq rəmzinə çevrilən Ulu Öndər elmin, təhsilin, iqtisadiyyatın, eləcə də səhiyyənin, tibb elminin dinamik inkişafının tənzimləyicisi kimi yaddaşlara həkk olunub”.