Ötən ay ərzində “Yeni klinika” tibb müəssisəsinə icbari tibbi sığortanın Xidmətlər Zərfi çərçivəsində müraciət edən vətəndaşlara ümumilikdə 47 483 ambulator tibbi xidmət göstərilib.

 

Bu barədə Aztibb.az-a “Yeni klinika”dan məlumat verilib.

 

Bildirilib ki, 2023-cü ilin mart ayı ərzində icbari tibbi sığorta çərçivəsində tibb müəssisəsinə ambulator tibbi xidmət üçün müraciət edən vətəndaşların sayı 10 407 nəfər təşkil edib.

 

Statistik məlumatlara görə, stasionar tibbi xidmət üçün Yeni Klinikaya müraciət edənlərin sayı 325, əməliyyat olunan pasiyentlərin sayı isə 339 nəfər təşkil edib.

 

Qeyd edək ki, “Yeni klinika”da 6 iyun 2022-ci il tarixindən etibarən icbari tibbi sığorta sistemi tətbiq olunur. Hər bir Azərbaycan vətəndaşı icbari tibbi sığorta ilə Xidmətlər Zərfinə daxil olan bütün tibbi xidmətlərdən ödənişsiz istifadə edə bilər. Ümumilikdə 300-ə yaxın həkim və tibbi heyətin çalışdığı Cənubi Qafqazın ən böyük tibb müəssisəsi hazırda ümumi cərrahiyyə, terapiya, təcili və təxirəsalınmaz tibbi yardım, reanimasiya şöbələri və poliklinikadan ibarətdir.