İcbari Tibbi Sığorta üzrə Dövlət Agentliyi (Agentlik) ilə Koreya Beynəlxalq Əməkdaşlıq Agentliyinin (KOICA) Azərbaycan Nümayəndəliyi arasında icra olunan “Səhiyyə sektorunun dəstəklənməsi” layihəsi çərçivəsində TƏBİB-in tabeliyindəki Akademik M.Ə.Mirqasımov adına Respublika Klinik Xəstəxanasının Pediatriya şöbəsinə tibbi cihazlar ianə edilib.
Aztibb.az-a Agentlikdən verilən məlumata görə, KOICA Azərbaycanlı Məzunlar Assosiasiyasının (KOAZ) maliyyə dəstəyi ilə ianə edilən cihazlar (inhalyator, elektron qulaq termometri, qlükometr və s.) uşaqlara göstərilən tibbi xidmətlərin keyfiyyətinin yaxşılaşdırılması məqsədini daşıyır.
Təqdimat mərasimində çıxış edən Respublika Klinik Xəstəxanasının direktoru Elviz Qasımov Koreya hökuməti tərəfindən ianə edilən avadanlıqların ambulator və stasionar şəraitdə uşaqlara vaxtında, keyfiyyətli tibbi xidmətlərin göstərilməsinə kömək edəcəyinə əminliyini ifadə edib. Qeyd edib ki, Koreya hökumətinin ölkəmizdə səhiyyənin inkişafına və əhalinin sağlamlığının qorunmasına göstərdiyi diqqət təqdirəlayiqdir.
Sonra KOICA Azərbaycan Nümayəndəliyinin direktoru Mun Conq Hyun çıxış edərək Azərbaycandakı səhiyyə qurumları ilə səmərəli əməkdaşlıqdan məmnunluğunu bildirib. Vurğulayıb ki, layihə çərçivəsində Agentliklə KOICA arasında imzalanmış Anlaşma Memorandumunun məqsədi Azərbaycanda tibbi xidmətlərin keyfiyyətini və əlçatanlığını təmin etməkdir.
TƏBİB-in Strateji inkişaf departamentinin rəhbəri Yaqut Qarayeva isə çıxışında tibb müəssisələrinin texniki bazasının gücləndirilməsi yönündə göstərilən dəstəyə görə Koreya hökumətinə minnətdarlığını bildirib və səmərəli əməkdaşlığın davam etdiriləcəyini qeyd edib.
Daha sonra Respublika Klinik Xəstəxanasının tibb işçilərinin infeksion xəstəliklərlə bağlı biliklərinin artırılması, bu sahədə Koreya təcrübəsinin öyrənilməsi məqsədilə təlim keçirilib. Təlimdə “Azərbaycanda yoluxucu xəstəliklərin qarşısının alınması” və “Ölkədə infeksion nəzarət və infeksiyaların profilaktikası ilə bağlı həyata keçirilən fəaliyyətlər” mövzularında təqdimatlar edilib, fikir mübadiləsi aparılıb.
