“Yeni klinika”da beşinci tibbi seminar təşkil olunub.

Aztibb.az-a Klinikadan bildirilib ki, seminarda “Hemostaz ve onun pozğunluqları” barədə araşdırma aparan həkim-hematoloq Sevil Cəlilova geniş təqdimatla çıxış edib.

Hemostazın üç mərhələsinin olduğunu qeyd edən (primer hemostaz, sekonder hemostaz, fibrinoliz) həkim onun vacib elementlərinin damar divarı, trombositlər və laxtalanma faktorlarının olduğunu bildirib.

Hemostazın hər hansı bir mərhələsində pozğunluq müşahidə edildiyi təqdirdə qanaxmaya meyilliliyin yarandığını deyən Sevil Cəlilova ən çox rast gəlinən qanaxmalar haqqında da məlumat verib.

Məruzəçinin sözlərinə görə, dəri qanaxmaları (petexiya və eksimoz), asan göyərmə, burun qanaxmaları, diş əti qanaxmaları, menorragiya, hematoma və ya hemartroz, mədə-bağırsaq qanaxması, hematuriya, hemoptiz və beyindaxili qanaxmalar tez-tez rast gəlinən şikayətlərdəndir.

Müayinə və müalicə prsoseslərinin müzakirə olunduğu seminar sual-cavab sessiyası ilə yekunlaşıb.