Zaqatala Rayon Mərkəzi Xəstəxanasında tibbi personal üçün “Tənəffüs və ürək dayanmalarında ilkin müdaxilələr, kritik vəziyyətlərdə mavi kod xidmətinin təşkili” adlı təlim keçirilib.
Aztibb.az-a Xəstəxanadan verilən məlumata görə, təlimdə Təcili və təxirəsalinmaz tibbi yardım şöbəsi, Reanimasiya, intensiv terapiya, anesteziologiya şöbəsi və digər stasionar şöbələrin tibb işçiləri iştirak ediblər.
Təlimi Keyfiyyətə nəzarətin idarəedilməsi komitəsinin rəhbəri Nüşabə Şahmərdanova açaraq tənəffüs və ürək dayanmalarında ilkin müdaxilə, mavi kod xidməti, onun aktivləşdirilməsi yolları, mavi kod zamanı istifadə olunan avadanlıqlar və s. barədə danışıb.
Daha sonra həkim anestezioloq-reanimatoloq İskəndər İskəndərov iştirakçıların nəzəri və praktiki biliklərinin daha da təkmilləşdirilməsi məqsədilə beynəlxalq standartlara cavab verən xüsusi rəqəmsal mulyajlardan və tibbi avadanlıqlardan istifadə edərək əyani şəkildə geniş izahat verib.