Dünyada ölüm riskinin əsas səbəblərindən biri olan ürək xəstəlikləri çox vaxt genetik olaraq irsi keçə bilir. Bu səbəbdən genetik tarixçənizi araşdırın və bilin!
Aztibb.az xəbər verir ki, bu barədə Liv Bona Dea Hospitalının həkimi, tanınmış ürək-damar cərrahiyyə uzmanı Cabir Gülmalıyev məlumat verib.
Onun sözlərinə görə, yalnız bir birinci dərəcəli qohumu ürək xəstəliyi olan insanlarda infarkt və qəfil ölüm riski dəfələrlə artır. Hər iki valideyndə ürək-damar xəstəliklərindən biri varsa, uşaqlarında eyni xəstəliyin yaranma riski 2-3 dəfə artır.
Cabir Gülmalıyev bildirib ki, bu səbəbdən bu cür şəxslərə erkən yaşlarda müntəzəm müayinələrə başlamaq tövsiyə olunur. Lakin bu o demək deyil ki, ailəsində ürək xəstəsi olan hər kəs potensial ürək xəstəsidir:
"Ailədə ürək xəstəliyi olan insanlar yemək vərdişləri, fiziki fəaliyyətlər, iş tempi və həyat tərzi ilə bağlı daha diqqətli olmalıdırlar;
Kiçik yaşlardan şəkər qəbulu tənzimlənməlidir;
Tərkibində trans yağlar olan və fast-food qidalardan istifadə edilməməlidir;
Fiziki aktivlik və idman ilə məşğul olunmalıdır;
Alkoqoldan imtina edilməli və ya azaldılmalıdır;
Stressin idarə edilməsi lazımdır".