Bakı Sağlamlıq Mərkəzində Avropa Uşaq Cərrahları Assosiasiyasının (EUPSA) Azərbaycanda I Uşaq Endoskopik Cərrahiyyə master-klassı və seminarı keçirilir. 

Aztibb.az-a Mərkəzdən verilən xəbərə görə, müəssisənin icraçı direktoru Asiman Həsənov tədbirin əhəmiyyətini qeyd edib.

EUPSA-nın prezidenti Amulya Saxenaya proqramın məqsədinin xüsusən gənc nəslin uşaq cərrahlarının inkişafına davamlı dəstək vermək olduğunu bildirib.

Bakı Sağlamlıq Mərkəzinin Uşaq cərrahiyyəsi şöbəsinin rəhbəri, t.ü.f.d. Toğrul Ömərov, t.ü.f.d., dosent Allahverdi Musayev, uşaq cərrahiyyəsi və urologiyası uzmanı Fuad Hüseynov və uzman həkim Cavid Nağıyevin rəhbərliyi ilə baş tutmuş master-klassda ölkəmizin tanınmış uşaq cərrahları ilə yanaşı, xarici həkimlər də iştirak ediblər.

Tədbirin ilk günündə endoskopik cərrahiyyə ilə idarə olunan ümumi, eləcə də müasir yanaşmalar haqqında mühazirələr dinlənilib, mövzular ətrafında fikir mübadiləsi aparılıb. Həmçinin iştirakçıların bacarıqlarını təkmilləşdirmək üçün Seçenov adına Birinci Moskva Dövlət Tibb Universitetinin Bakı filialında praktiki təlimlər keçirilib.

Növbəti seminar praktiki işlərə həsr olunacaq və iştirakçıların bacarıqlarını artırmaq üçün modellər üzrə təlimlər baş tutacaq.

Qeyd edək ki, Bakı Sağlamlıq Mərkəzi müasir tibb sahəsində ölkəmizdə ilk dəfə keçirilən bu layihəyə ev sahibliyi edib.