Samsun Ondokuz May Universiteti (OMÜ) Tibb fakültəsi Nevrologiya Bölümünün rəhbəri, prof. Murat Terzi süni intellekt sayəsində xəstələrin xüsusi otaqlarda qeydə alınan səsləri, yeriyiş və MRT görüntülərindən nevroloji və fiziki sağlamlıq problemlərini aşkar edə bildiyini deyib.

Aztibb.az-ın medimagazin.com.tr-yə istinadla xəbərinə görə, türkiyəli professor bir çox sahələrdə istifadə edilən süni intellektin səhiyyə sahəsində də tətbiq edildiyini bildirib. O, xəstələrin xüsusi otaqlarda səslərinin qeydə alındığını, MRT görüntülərinin süni intellektlə köçürüldüyünü və sağlamlıq problemlərinin təsbit edildiyini qeyd edib.

Bir ildir ki, süni intellekt texnologiyası üzərində çalışdıqlarını deyən M.Terzi xəstələrin audio və video görüntülərini aparata köçürdüklərini və beləliklə, xəstənin görüntüsü və səsindən beyinin hansı hissəsinin təsirləndiyini öyrəndiklərini bildirib: "Sağlamlıqda süni intellektin istifadəsi baxımından bu araşdırmanın əhəmiyyətli olduğunu düşünürük. Əldə etdiyimiz məlumatlar sayəsində həm diaqnoz, həm də gedişat barədə mühəndislərlə işləyirik. Təbii ki, süni intellekt xəstənin məlumatlarına əsaslanaraq hansı müalicə metodundan istifadə edəcəyimizdə bizə böyük dəstək verir. Çünki, bir dərman hər xəstədə eyni nəticə göstərmir".