Diafraqma yırtığı yenidoğulmuş uşaqlarda hər 1000-5000 uşaqdan birində rast gəlinən anadangəlmə inkişaf qüsurudur. Bu problem uşaq cərrahiyyəsində ən ağır cərrahi problemlərdən biridir. Çünki bu, hamiləlik vaxtı yaranan bir problem olur və adətən ürək ətrafnda qaraciyər, dalaq, bağırsaqlar inkişaf etdiyinə görə, ağciyərin ciddi şəkildə sıxılması səbəbindən ürək önündə təzyiq yaranır, burada hormonal hipertenziya yaranır və həm ürəyin, həm də ağciyərin fəaliyyəti pozulur.

 

Diafraqma hamiləliyin 4-cü həftəsində formalaşır, yırtıqlar adətən 12-ci həftədə görünməyə başlayır. Bu elə bir qüsurdur ki, hətta dünyanın ən inkişaf etmiş ölkələrinin klinikalarında belə doğulmuş hər 4 uşaqdan biri həyatını itirir. Yəni dünyada icra edilən bu əməliyyatlardan uğurla başa çatanları 70%-i ötmür. Əməliyyatsonrası bu uşaqlara peşəkar tibb işçilərindən ibarət komanda xidmət etməlidir. Çünki bu uşaqlar düzgün qidalandırılmalı, həkimlərin nəzarəti altında olmalıdırlar. Belə ki mədə və bağırsaqlar yerini dəyişdiyinə - qarın boşluğuna köçürüldüyünə görə qidalanma zamanı qarın şişməsi, qusma kimi şikayətlər ola bilər.