Böyük Britaniyada gənələrin daşıdığı virusun yaratdığı nadir ensefalit (beynin iltihabı) halı müşahidə edilib.

Aztibb.az-ın medimagazin.com.tr-yə istinadən məlumatına görə, Böyük Britaniyanın Sağlamlıq Təhlükəsizliyi Agentliyinin (UKHSA) rəsmiləri xəbərdarlıq edib ki, "gənə ensefaliti (TBE)" riski hələlik aşağıdır, lakin virusu daşıyan gənə növü bütün Böyük Britaniyada geniş yayıldığı üçün ehtiyatlı olmaq lazımdır.

Səlahiyyətlilərin açıqlamasında 2022-ci ildə yalnız bir nəfərin xəstəliyə tutulduğu, virusa yoluxanların əksəriyyətində xəstəliyin heç bir əlamətinin olmadığı, lakin xəstəliyin beyində ödem əmələ gətirə biləcəyi bildirilib.

Xəstəliyin aşkarlanmasını sürətləndirmək üçün sınaq proseslərində dəyişikliklər edildiyini vurğulayan UKHSA rəsmiləri həşərat dişləməsi zamanı davranış qaydaları ilə bağlı tövsiyələr verib.

İngiltərə və Şotlandiyada bir xəstədə mümkün gənə ensefalitinə görə ehtiyat tədbirlərinin artırıldığı qeyd edilib.

Bundan əlavə, Yorkşirdə təsdiqlənmiş hadisədən sonra səlahiyyətlilərin heç bir simptom göstərməyən kontaktlarda virusu aşkar etmək üçün qan testləri də apardıqları açıqlanıb.