Zoonoz xəstəlikləri heyvanlar və insanlar arasında ötürülərək, yaşayış vasitələrinə, eləcə də milli və qlobal səhiyyə təhlükəsizliyinə ciddi təsir göstərir. İnsan-heyvan-ətraf mühit daxilində belə mürəkkəb səhiyyə böhranının həll olunması üçün çoxsahəli vahid səhiyyə yanaşaması tələb olunur.

 

Aztibb.az Ümumdünya Səhiyyə Təşkilatının (ÜST) Azərbaycan nümayəndəliyinə istinadla xəbər verir ki, ÜST-nin, BMT-nin Ərzaq və Kənd Təsərrüfatı Təşkilatı və Ümumdünya Heyvan Sağlamlığı Təşkilatının ekspertləri bu məsələləri müzakirə etmək və koordinasiyanı gücləndirmək üçün çoxsahəli vahid səhiyyə koordinasiyası mexanizminin inkişafı üzrə seminar təşkil edib.

 

Tədbirin məqsədi müvafiq texniki və siyasi sektorlardan həmkarları bir-birilə tanış etmək, sözügedən məsələ üzrə yüksək səviyyədə siyasi dəstək üçün təbliğat aparmaq və zoonoz xəstəliklərlə mübarizə üçün vahid səhiyyə üzrə çoxsahəli əlaqə mexanizmi yaradaraq inkişaf etdirmək olub. Bununla yanaşı, Üçtərəfli Zoonoz Bələdçisində (TZQ) qeyd olunmuş prinsiplərə əsaslanaraq çoxsahəli koordinasiya mexanizmi üçün yaradılmış xüsusi əməliyyat vasitəsinin (MCM OT) səkkiz addımını izləməklə Azərbaycanda zoonoz xəstəliklərin idarə olunması üçün koordinasiyanı gücləndirmək seminarın gündəliyində öz əksini tapıb.