Səhiyyə Nazirliyinin İctimai Səhiyyə və İslahatlar Mərkəzi (İSİM) və Ailə, Qadın və Uşaq Problemləri üzrə Dövlət Komitəsinin birgə əməkdaşlığı ilə Mədəniyyət və Sənətkarlıq üzrə Bakı Dövlət Peşə Təhsil Mərkəzində reprodutiv sağlamlığın qorunması, ailə planlaşdırılmasında sağlam vərdişlərin formalaşdırılması, selektiv abortun qarşısının alınmasına dair maarifləndirici tədbir keçirilib.

 

İSİM-dən Aztibb.az-a bildirilib ki, tədbirdə Mərkəzin həkim-metodisti Zümrüd Kazımova təqdimatla çıxış edərək erkən nikahın fəsadlarından danışıb. O, erkən nikah hallarının yeniyetmələrin sağlamlığına ciddi mənfi təsir göstərdiyini, ailələrdə münaqişələrə, boşanmalara və nəticədə sosial cəhətdən həssas qrupların sayının artmasına səbəb olduğunu qeyd edib. Məruzəçi reproduktiv sağlamlığın qorunmasının vacibliyini vurğulayaraq, abortun sağlamlıq üçün təhlükə yaratdığını bildirib və tibbi göstəriş olmadan qadınları buna yol verməməyə çağırıb.

 

Daha sonra çıxış edən Ailə, Qadın və Uşaq Problemləri üzrə Dövlət Komitəsinin Ailə problemləri şöbəsinin müdir müavini Kamila Əliyeva ailə planlaşdırılmasının vacibliyini və cins seçiminə görə abort hallarının baş verməsinin fəsadlarını vurğulayıb. O, doğulacaq körpənin cinsi ayrıseçkiliyi cəmiyyətimizdə oğlan və qız uşaqlarının sayında disbalans yaradaraq demoqrofik vəziyətə öz mənfi təsirlərini göstərə biləcəyini və selektiv abortlara yol verilməsi ilə qadın sağlamlığının təhlükəyə atıldığını qeyd edib.

 

Sonda iştirakçıları maraqlandıran suallar cavablandırılıb və onlara maarifləndirici materiallar təqdim olunub.